Mizo midfielder kum 20 mi, Lalremtluanga Fanai chu Bengaluru FC tan a rinawm zel a, Zirtawpni khan Indian Super League (ISL) club-ah hian contract thar a ziak a, Karnataka club-ah hian 2027-28 season tawp thleng a la awm ang.
Lalremtluanga Fanai chuan, “Bengaluru FC-ah contract ka ziah belh thei hi ka lawm hle a. Helai hmunah hian rawlthar ka nih laiin ka lut a, season li chhungin nasa takin hma ka sawn a ni,” a ti.
“Coach leh player-te hian min thlawp thain min dawm thiam em em a, helai hmun hi ka than zelna tur hmun dik tak niin ka hria. He football club nen hian chanchin duhawm tak kan siam belh zel ka beisei,” a ti bawk.
Darren Caldeira, BFC Director of Football chuan Mizo tlangvalin contract a ziak thar chu lawmawm a tih thu sawiin, “Kum 20 chauh la ni mah se Fanai hian a puitlinzia a lantir nasa hle a, a invawn theih dan em em hi a kum phu lo a ni chiang,” a ti.
“First team lamah season hnih chhunga hma a sawn dan khan kan lung a tiawi hle a, football club duhthusam ang chu a rawn tihlawhtling zel a ni ber. Hun kal zel turah kan hnena a awm thei tur hi kan zavaiin kan lawm vek a ni,” a ti bawk a ni.
Kum 2020-ah khan Lalremtluanga Fanai hian Bengaluru FC hi a zawm a, hma a sawn nasa hle a, midfielder rintlak a nihna a lantir fo thin a. Spanish coach Gerard Zaragoza kaihhruaina hnuaiah a che chhe lo thei hle.
A tirah chuan Bengaluru FC U18 Academy team-ah a khel thin a, chu mi hnuah BFC Reserve team lamah a khel leh a. 2023-24 tan dawnah khan Lalremtluanga Fanai hi ISL squad-ah a tel ve ta a ni.
First team-a a game hmasa ber chu 2023 Super Cup-ah niin, Sreenidi Deccan FC a hmachhawn a. ISL-a a inkhel hmasa ber chu he mi season-ah tho hian Pubjab FC nen an inkhelh tumin a ni.
Lalremtluanga Fanai hian ball khawih a hnehsawh hle a, a ball pass a dik bawk a. Mi chuhah pawh a ngaihtuahawm lo viau a, awmna tur hmun a hria a, inkhel kalhmang a hrethiam zung zung bawk.
Season hnih liam ta chhung khan ISL-ah vawi 36 a inlan thei a, a naupan ngaihtuahin khelhna hmun a chang hnem hle.