Aizawl: MNF Senior Vice President Dr R Lalthangliana chuan Mizoram sorkar chu central lama an tlaktlum loh avangin Sinlung Hills Development Council (SHDC) tana budget a pun tam vak a rin loh thu a sawi.
Nilaini khan Dr.R.Lalthangliana hian MINECO hmuna Sinlung Hills District Council (SHDC) pisa tlawhin, Executive Member-te nen an inkawm a. He hunah MNF Sr Vice President chuan tun tum SHDC inthlan khan an party atangin bial thenkhatah MNF official candidate-te an din thuah hlawm a, chuti chungin ZPM sorkar hlim vanglai takin hnehna sang tak an chang chu lawmawm a tih thu a sawiin, din thuahtu awm lo se chuan ZPM kha an tlin ve mumal a rin loh thu a sawi.
Dr. Thangtea chuan, tun tum budget session khan Demand number 15 naah SHDC budget Rs nuai 701.34 kha a ni a. Budget-ah hian Civil works atan Rs nuai 150 dah hi bial 12-a hnathawhna tur chuan a beithamin, budget piah lam thil sawi hova hmalak chu thil tul tak a ni tih sawiin, “CADC, MADC, LADC-ahte pawh hnathawkna tur sum a tlem thin hle a. He lai tak hi ngaihtuahna sen lai ngai tak chu a ni,” a ti.
Mizoram sorkara budget awm sa hi hriat theuh angin a hun leh hma chu tihpun dan a awm tawh lo tih sawiin Dr Thangtea chuan, “Nakkum budget lo awm tur pawh khi an sual vang ni lovin a pun tam vak ka ring lo. A chhan chu, anmahni tawngkam avangin central lamah an tlatlum si lo a. ZPM sorkar hian chet ngaihna an hre vak lo ang,” tiin, hmasawn tur chuan SHDC member-te hian bial chhung theuhah thil pawimawh tihtur bik en thiam a, DPR siam thiam leh bawhzui thiam a pawimawh thu a sawi.
Dr. Thangtea hi SHDC CEM Ricky Lalremsanga leh SHDC Executive Member-ten an lo dawngsawng a ni.