Chief Minister Lalduhoma’n Sairang atanga New Delhi thleng Rajdhani Express service-tir tur leh Sairang atanga Kolkata thlenga Howrah Railway Service thlentir a nih theih nana hma la turin Union Railway Minister Ashwini Vaishnaw ngen.
Thawhlehni khan chief minister hian Union Railway Minister Vaishaw chu New Delhi-ah kawmin Bairabi-Sairang rel kawng hmasawnna tur pawimawh hrang hrangte a sawipui a. Rajdhani Express Service chu Sairang atanga New Delhi thleng tlantir tur leh Howrah Railway Service pawh Sairang atanga Kolkata thlenga tlantir tur leh Sairang atanga Tripura direct rail service a awm theih nana hma la turin a ngen.
Chief minister chuan Sairang Railway Station chu India ram hmun danga an kalpui mek ang bawkin world class railway station-a siam tur leh Railway Reservation Centre leh Parcel Management System din te, Sairang Railway Station-a Railway Internet Service dah ve tur tein a ngen bawk.
Union minister chuan tihhlawhtlin mai theih thil a nih thu leh hma a lo lak ngei tur thu a sawi.
Mizorama railway station hrang hrang – Hortoki, Kawnpui, Mualkhang leh Sairanga thawktu tur laknaah khawtual mite duhsak bik turin rawtna a thlen bawk a. Railway minister hian a lo zirchian tur thu chief minister hi a hrilh a ni.
Thawhlehni vek khan Chief Minister Lalduhoma hian Minister of Housing & Urban Affairs & Power Manohar Lal chu New Delhi-a a chenna inah kawmin, Thenzawla Peace City dinna tur atana detailed project report siamna tur sum Rs vbc 10 Ministry of Housing & Urban Affairs-in a pek avangin lawmthu a sawi a. 10% GBS leh RDSS hnuaia Mizoram sorkarin project proposal a thehluhte leh kawlphethaa Mizoram hmasawnna tur hrang hrangte a sawipui bawk.