Aizawl: Neihbawiha Synod Revival Camping Centre (RCC) ram huam chhungah Lalsiamkima (31) s/o Lalnghilhlovi, Bawngkawn chu thia hmuh a ni.
May 5, 2025 atang khan Synod Revival Committee buatsaihin ruihhlo ngaite pualin Neihbawiha Synod RCC hmunah thla khat chhung awh tur camping buatsaih a ni a. He camping-ah hian Lalsiamkima pawh a lut a. May 7 atang khan a awmna chin hriat a ni lo.
Thudawn danin, May 5 khan camping hi neih tan ni mah se, beisei aia tam camping-ah an luh avangin camper-te hming vawn fel lawk theih a ni lo va. Camp duty lam pawhin Lalsiamkima chanchin hi an hre lawk lo va. May 25 zing khan KTP hruaituten Lalsiamkima chhungte pawh hi hrilh chauh a ni.
A chanchinte an inzawh chian hnuah May 27, 2025 zan khan Bawngkawn Branch YMA OB te nen an sawi ho hnuah, nimin khan mi 10 bawr velin an zawng hmasa a, an hmuh mai loh avangin Bawngkawn veng chhung whatsapp group-ah Lalsiamkima bo thu hi theh darh a ni a. A chanchinte ngaichang a, boruak a zirin ni sarih chhung zawn hna kalpui tura ruahmanna siam anih laiin, nimin chhun dar 1:30 vel khan Lalsiamkima ruang hi Synod TCC ram huam chhungah hmuh a ni ta a ni.
A ruang hi hmuh a ni veleh ruang la turin Police leh Bawngkawn YMA hruaitute an kal nghal a. Tihfel ngaite tihfel a nih hnuah Synod RCC-ah Synod Revival Director Rev. J.C. Lalramliana’n tawngtaina hun hmangin a thlah liam a. Bawngkawn panpui nghal a ni.
Lalsiamkima ruang hi nizan khan Civil Hospital, Aizawl-a ruang dahnaah dah a ni a, a ruang tel lo vin an inah lumen a ni. Tukin zingah postmortem a ni a, chumi zawha vui tura ruahman a ni.