- Dr. C. Lalrampana
A KAMKÊUNA
Mi fing zik tluak lo, engkim hrilh chawp ngài leh finchhuah ngai an awm thin. Chutiang mi chu zirtir an ngai thin a, a tul dan azirin ben harh deuh dawt pawh an ngai thin. Tun tuma Zoram pumpui luahkhattu TBCC chungchangah pawh Sawrkarin a dintupa Pu TT Zohmingthanga a ben harh zawh ngam loh laiin Pu TT Zohmingthanga zawk hian Mizoram Drug Act, 2016 and The Mizoram Drug Treatment cum Rehabilitation Centre Accreditation Rules, 2019 hman tangkaina tur chungchangah Mizoram sawrkar a lehben harh chawp ta hlauh zawk hi a van zahthlak tehlul êm!
DÂN UTAWK TÛR VAWN
The Mizoram Liquor Total Prohibition Act, 1995, 20 February 1997 atanga hman tan tur zu zawrh leh in khap a ni a, kum 2007 khan MLTP Act chu siamthat a ni a, kawlthei leh grape zu siam phal a ni a, mahse, Zoram Liquor (Prohibition) Act, 2019 chu 28th May, 2019 atang khan hman tan a nileh a. Mizoram Liquor (Prohibition) Amendment Bill, 2025, tualchhung wine leh beer siam phalna chu dodalna nasa tak karah pawh pass a ni a. He bill hian ramdang mi pawimawh leh tourist-te hnenah special liquor permit a pe thei bawk a ni. Hetiang khawp hian Mizoram Sawrkar Ministry hrang hrang kal tawhte leh tuna sawrkar mek pawh hian zu khapna dan an ngaihvena hman tangkai nachang an hriat êm êm laiin Ruihhlo thununna dan NDPS Act, 1992, amendment Act, 2020 & Mizoram Drug Act, 2016 and The Mizoram Drug Treatment cum Rehabilitation Centre Accreditation Rules, 2019 dan tha tak tak kan neihsa reng chu hman nachang hre lovin an utawk tur vawn mai mai a, kum 1984-2025 kum 41 chhung zet ruihhlo kan do tawh hnuah pawh ruihhlo ngawlvei enkawlna centre/home 40 chuang zet awm mek zingah sawrkar dan The Mizoram Drug Treatment cum Rehabilitation Centre Accreditation Rules, 2019-anga Accreditation nei chu centre 11 vel chauh an awm niin a lang a, hei hian Mizoram sawrkar leh YMA/NGO/ Kohhranhote’n Zu ringawtah rilru an sen zawkzia a tilang chiang hle niin a ngaih theih. Mizoram sawrkar apiang hian NGO/Pressure group/kohhran an ngam lova, sawrkar flagship program pawh tha takin an kalpui hlei thei thin lo ni berin a lang. Hei vang hian sawrkar hian office of procedure leh rule of law pawh a nihna angin a kalpui ngam lova, thin phu dêp dêpin ke a pen a, mipui hruaitu zawk tur a nih laiin mipui hnuh kalin a awm zawk zel a, hei vang hian dan leh hrai tha tak pawh nei teuh mah ila sawrkarin a utawk tûr vawn tlat chuan dân awmze nei lo a ni tihna a ni a, tangkaina pakhatmah a awm lo tihna tluk a ni. ZPM Sawrkar hlim khan ‘NGO leh pressure group an ngamleh lovang’ tih thupui hmangin Article ka ziak tawh a, ka rin lawk ang chiahin tuna sawrkar pawh hian Govt. Notification, order, circular a chhuah tawh engemawzat chu a siamtha, thlakthleng,tidanglam, sutlet vel niai nuai tawh tih mipuiin kan hre theuh awm e. Chuvangin, sawrkar tha, sawrkar huaisen, tute emaw kawih her mai mai theih loh rorelna dik a taka huaisen taka kalpui ngam central BJP (NDA) sawrkar anga huaisen hi kan state hian a mamawh takzet ta a ni.
A TLÂNGKAWMNA
TBCC-ah hian ruihhlo vanga buai mi 980 vel an awm a, May 8, 2025 khan mipa 190 leh a tukah hmeichhia 39 an chhuakleh a; a tawpah phei chuan mi 66 vel chauh chhuak bangin mi 914 an chhuak fai vek tihna a ni. Social media platform hrang hrangah TBCC founder Pu TT Zohmingthanga chu thiamloh chantirin tawngkam feikibarin an khawh zuai zuai a, a dik emaw dik lo emaw pawh ni se, a tuartu tan chuan a khal ve khawp ang. Mahse, hetianga TBCC a puahdarhna chhan ber hi sawrkar nep lutuk vang zawk a ni. He centre neitu hian The Mizoram Societies Registration Rules 2006 angin a firm hi a register duh lo tih sawrkarin a hre reng a, chutichung chuan sawrkarin he centre hi thiat ngam lovin a duh duhin a taltir ni berin a lang a, tanpuina engemawzat a la pe zui a, a tawpah a zawh tawh ngang loh avangin a puak keh ta ni berin a lang. The Mizoram Drug Treatment cum Rehabilitation Centre Accreditation Rules, 2019 dan tha tak kan neihsa reng hi sawrkar kal tawhte khan a takin hmang ngam se’ng chuan TBCC hi puakdarh tur a awm tawh lovang emaw, a in register duha dan a zawm duh a nih pawhin hming tha takin a awm tawh zawk ngei ang. Tunah sawrkar leh mipui kan mangang a, khawlaiah drugs addict an inpel suau suau a, awmna tur mumal nei lo engemawzat an khuangruang vahvel bawk a, hei vang hian SW Minister-in kum 41 hnuah he centre hi tharthawh thaleh turin a’n nawrzui leh ta nghal chu a ni a, sawrkar thangharh tlai lutuk hi chuan kan ramah chhiatna nasa tak a la thlen zel dawn nite pawhin a lang. Mizoram sawrkar hnuaiah department 40 chuang a awm a, department tinah hnathawktu indaih tih lai reng a awm lova, chutih laiin dawrawn style-in hna sang chelhtu lam an pung tual tual a, establisment staff erawh an artelukawn lo chauh vek a, hna a kal chak thei thin lo a ni. Office of procedure & rule of law angin eng department-ah mah kal hleih theih a ni lova delegation & decentralization of powers lamah Ministry chelhtu apiangin an department chan apiangah centralization of powers an kalpui niin a ngaih theih a, an zoleh tak tak si lova eng hna mah a chak thei lo a ni. Secretariat-a LDC atanga CM hnen thlenga kal chi hna pawh kal lam haw lama a lo chhuahleh thlengin dawhkan (Table) 138 a tlawh kim a ngai a, British sawrkar intihlalna tha lo tak lengthy procedure kan la kalpui reng hian ram hmasawnna nasa takin a timuang (stagnation) a siam a, hmasawn chak a har takzet a ni. Engpawhnise, mipui sawrkar hian Ruihhlo drugs nge a vei Zu, ruihlo alcohol (liquor) tih leh a pahnihin a takin dân hmangin a do tak tak ngam dawn em tih i lo thlir phawt teh ang u.