Aizawl: Adviser to Chief Minister (handholding) Dr KC Lalmalsawmzauva’n aieng chu tual chhunga tihral tura policy duan a nih avangin, sawhthing anga tam tak thar an tinzawn ber a nih rih loh thu leh support price sen a ngaih rih loh thu a sawi.
ZIDCO leh Lushai Organic-te thawkdunin Luangmual Industrial Growth Centre-a aieng sawngbawlna hmun an siam chu nimin khan Adviser to CM Dr KC Lalmalsawmzauva’n a hawng a. Sorkar flagship programme Bana kaih (hand holding) hnuaia thlai thar sawngbawlna hmun hlawhtling hmasa ber a nih thu a sawiin, Chief Minister Lalduhoma kaihhruaina hnuaia aieng sawngbawlna hmun an nei thei chu lawmawm a tih thu a sawiin, ZIDCO leh Lushai organic te chungah lawmthu a sawi.
Dr KC Lalmalsawmzauva chuan, Centre-ah hian aieng chauh ni lo, sawhthing pawh a khawih tel thei tura beisei a nih thu leh aieng duhkhawp her tur a awm loh pawhin sawhthing sawngbawl nana hman theih an beisei thu a sawi.
Adviser to CM chuan aieng chu tualchhunga tihral tura policy duan a nih avangin, sawhthingte anga tam tak thar an tinzawn ber a ni rih lo tih sawiin, “Kan mamawh intodelh thei tura ngaihtuahna sen a ni. Chuvangin, collection centre pawh kan siam lo a ni. A support price thuah pawh factory rate-a siam a ni a, loneituten an hralh duh chuan factory-ah an phurh thlen a ngai a, a hring Rs. 20 (15+5), a ro zaihlep (slice dry) Rs. 130 (125+5), a thlar chawpa tih ro (Finger dry) Rs. 150 (140+10) a ni dawn a ni,” a ti.
Tun dinhmunah sorkar rate aia sanga lo neituten an hralh theih avangin support price hi sen a ngai rih lo tih sawiin, Dr KC Lalmalsawmzauva chuan, “He project-ah hian aieng leina tur belh tel a nih avangin, nakumah pawh eng emaw zat hi chu lei thei turah kan inngai,” tiin, a hralhna thuah pawh Sanjit Kumar Dey, Bama dawr, Aizawl nen thawhho an tum thu a sawi bawk.