Mohamed Salah chuan kumin hi a tan chuan Ballon d’Or dawn theihna hun tha a nih thu a sawi.
Liverpool forward Salah hian tun season chhungin Premier League goal 28 a thun bakah mi goal thun tur vawi 18 a siamsak a, amah tluk phak awm lovin Golden Boot a dawng tawh.
Kum 32 mi, Salah hian kumin April thlaah khan Anfield-a kum hnih cham belh turin contract a ziak a, Ballon d’Or dawng thei tura rin kai ber pawl a ni mek bawk.
September 22-ah khian Paris khawpuiah he chawimawina ngaihhlut hlawh hi an sem ang.
Salah chuan, “Tun season ang reng renga season hman that hi ka la nei lo a tih theih a, nomawi kan la bawk a, hei vang tak hian ka tan chuan Ballon d’Or dawn theihna kum tha tak a ni a tih loh theih loh,” a ti.
Ballon d’Or dawng tur hian Salah chuan Barcelona winger Lamine Yamal bakah Paris Saint-Germain forward Ousmane Dembele te hi a khum a ngai dawn a. Dembele hian Uefa Champions League final a la hmabak a, an dinhmunin a hmaa chawimawina dawn theih awm mek hi a hril ngeiin a rinawm.