Aizawl: Leader of Opposition Lalchhandama Ralte, Tuivawl MLA chuan nimin khan Darlawn RD Block Golden Jubilee lawmna a hmanpui a. Jubilee a lawmpui thu leh RD Block thar indan a hun tawh tih a sawi.
Lalchhandama Ralte chuan Darlawn RD Block, kum 50 hmel hmu tawh hian fa hrin neih a hun tawh hle nia a hriat thu a sawi a. Block chhunga khaw hla ber chu Aizawl atanga km 200 vel a ni a. Block then tam hi hmasawnna bul a nih thu sawiin, “Central atanga scheme lokalte hi a zarzotu an tam poh leh hnathawhna tur a lokal tam dawn a ni,” a ti.
RD block atanga hmasawnna kal chhuak PMKSY hna hi party worker-te kuta awm tawh lovin, a thlenna tur takah thlengin, Watershed Committee kutah awm tawh se tiin Lalchhandama Ralte hian sorkar a ngen.
“Tuivawl bialah landlock kan nei a, he tlang dung hi hmar thimpui tih a ni hial thin. Amaherawhchu, NH02 leh 306A hmasawnna lo kal turah kawtchhuahpui kan ni dawn. Zangnadawmna awm theiah VC-ten ram lo inpe suh u,” tiin, zangnadawmna tam lutuk avanga an bial hmasawnna tur hna a thuanawp a hlauhawm tih a sawi bawk.
Lalchhandama Ralte hian jubilee lawmpuina thilpek a hlan bawk.