Aizawl: MZP Gen. Hqrs Executive Meeting chuan Mizoram chhung Phuldungsei khua Thaidawra tu tih hriat lohten bomb hmanga Tripura sorkarin Forest Guest House a sak mek beihna chhui chiang thuai tur leh Forest Guest House sak mek titawp nghal tura hma la turin Mizoram sorkar a ngen.
Nimina MZP Pisapuia thukhawm chuan, May 28, 2025 zing dar 2-3 inkara Mizoram chhung, Phuldungsei khua Thaidawr tlang pan chhohna kawng sir a, Tripupra sorkarin Forest Guest House an sak mek tu tih hriat lohten bomb hmanga beih a ni chu pawi an tih thu leh an dem thu an sawi a. He thil thlenna hmun hi Mizoram chhung anih avangin, a rang lama thil thlen dan chhui tur leh Tripura sorkarin Forest Guest House an sak mek hi remchanga laa titawp nghal tur leh, Thaidawr tlang pannaah Mizoram Police duty dah ve nghal turin in Mizoram sorkar an ngen.
MZP chuan Mizoram chhunga Tripura sorkarin Forest Guest House an sa ngawt mai leh, a bul lawkah Tripura State Rifle te an duty reng laia beih a ni hian, Mizoram puh hmingchhiatna tura thiam taka ruahman a ni ang em tih chu an ngaihtuahna a nih thu sawiin, “Phuldungsei mipuite tithlabartu leh Mizoram mualphona thlen thei thil thlen dan hi chhui chhuak vat turin Mizoram sorkar kan ngen,” an ti.
MZP chuan Thaidawr tlang chhehvela Tripura sorkarin kut an thlak reng chu a ngaimawh avangin, an president H Lalthianghlima hovin April 16, 2025 khan an lo tlawh tawh a. Tripura sorkar hmalakna chu a rang thei ang bera chawlhsan turin an lo hrilh tawh tih an sawi bawk.