Aizawl: Mizoram Pradesh Youth Congress Committee (MPYCC) leh Lunglei District Youth Congress Committee (LDYCC)-ten nimin khan intuaitharna hun an hmang a. He huna thusawitu MPYCC Senior Vice President Ngurdingliana Pachuau-in NITI Aayog meeting-ah Chief Minister Lalduhoma’n thu dik lo sawiah a puh.
MPYCC Office, Congress Bhawan, Aizawla hun hmanah Ngurdingpuia Pachuau chuan tun hnaia New Delhi-a NITI NITI Aayog Governing Council vawi 10-naah Chief Minister Lalduhoma’n Aizawl khawpuiah Mizoram mipui zawng zawng zaa 80 chu an cheng anga a sawi chu thudik tawk lo a nih thu a sawi.
Ngurdingpuia Pachuau chuan chhiarpui hnuhnung ber, kum 2011 census-ah Aizawla mipui cheng zat hi Mizoram mipui zawng zawng atanga teh pawhin 27% chauh an nih thu a sawiin, “Chief minister hian state hrang hrang data kimchang neitu, Planning Commission thlaktu leh state tinte dinhmun chiang taka hretu NITI Aayog hmaah thudik tawk lo hmangin boruak siam tum luatah dawt a zu sawi ta mai em ni?” a ti.
He hunah hian LDYCC President Moses Lalrinchhana Chinzah pawhin thu a sawi bawk.