Rawlthar zawkte ruihhlo laka inthiarfihlim tura fuihna ‘theme song’ nen Youth Icon 2006 intihsiaknaa top 10 te chuan recording studio an lut ta.
Kum 19 zet a ni ta! Mizorama zai intihsiakna reality TV show hmasa ber Youth Icon kha. Hemi tum hian theme song pakhat an nei, chu chu Lalsangzuali Sailo (fam) hla phuah — Rawlthar Tang Fan Fan — tih a ni. He hla hmangin Icon round thenkhatah an intihsiak nghe nghe. Khatih laia theme song atana an hman chhan pawh kha, rawlthar zawkte ruihhlo laka inthiarfihlim tura fuihna ‘hla pui’ atan hman a ni.
Ruihhlo boruakin kan tun lai khawvel a tuam mek karah, Youth Icon 2006 top 10 te hian an hla pui hmangin recording studio an lut a — Rawlthar Tang Fan Fan — tih hla an rawn thar thawh leh dawn a. Arrangement thar hlak nen track vel an buaipui fel vek hnuah, Bawngkawn a recording studio changtlung tak, Rock of Ages studio-ah kim takin an luh pui thei ta.
Recording an tih zawh hnuah, music video an la siam leh dawn a. An music video tihchhuah hun tur erawh hriat theih a la ni lo.
Youth Icon hmasa ber Zoramchhani chuan, “Tun lai kan ram hi ruihhloin min run nasa lutuk hi min thawng a. Ruihhloin kan thalai tam tak min tibuai a, ramin a tuar mek a. Chutiang boruak karah music hmangin kan thalaite, ruihhlo bawiha la tang ve lote chu thu tha fah kan duh a. Ruihhlo bawiha tang mekte pawh an sal tanna atanga zalenna dar an vuak theih nan fuih kan duh bawk. Tihtheih kan nei tlem a, theihtawpa music hmanga thalaite fuiha au chhuah hi kan tih ve theih niin kan hria,” tiin music video siam an tum chhan Thalai Times a hrilh.
YOUTH ICON 2006 TOP 10-TE KHA, AN INDAWT DANIN:
- Zoramchhani
- Hmingsanga
- Esther Lalchhanchhuahi
- K Remmawia
- Zomuanpuii
- Vanlalchhanhimi
- K Lalhmingliani
- Sarah Lalngaihawmi
- Lallawmawma
- H. Lalremruati