Raltlan leh pem phurtu lawngleng tê chi, Spain-a Canary Islands-a lawngchawlhna pakhat pan chu chesualin hmeichhia pali leh hmeichhe naupang pathum an thi niin Spanish emergency services-in an sawi.
Tual chhung chanchinbute chuan lawngah hian mi 100 chuang chuangin an tawt hle a, Nilaini khan an chesual niin an tar lang a. Spanish chhanchhuah hna thawktu leh Red Cross member-ten mi eng emaw zat tui atangin an la chhuak.
Red Cross thupuangtu, Alexis Ramos chuan broadcaster RTVE hnenah ‘mi 100 chuang daih an ni mai thei’ tih sawiin chin hriat lohva la awm zat tak erawh a sawi thei rih lo tih a hrilh.
Spain-a maritime rescue service chuan chhanchhuah hna thawktuten naupangte chu El Hierro thliarkara lawngkai pakhatah an la hlawm tih an sawi a. Lawng chesual tak hi vaukam atanga km 10 chuanga hlaah a la awm niin an sawi.
Lawnga chuangte hi an insawi thut a, lawng hi nasa taka leiin a chuangte chu tuiah a vawrh chhuak ta niin service chuan a sawi bawk.
Canary Islands emergency services chuan hmeichhia pali, tleirawl pakhat leh hmeichhe naupang pahnih an thi niin an sawi a. Helicopter-in hmeichhia leh mipa naupang pakhat ve ve chu an dinhmun a that vak loh avangin damdawi inah lak an ni tih an sawi bawk.
Africa khawthlang tuipui kama awm, Spanish thliarkar awm khawm hi an rama an dinhmun chhe lutuk tlansan tumin pem leh raltlanten an pan nasa em em a. A pan nan hian tuipuia thui tak chuan nana hman chi loh tak thelret lawngleng leh lawng chhe tak tak an hmang thin.
Africa atanga Europe pana Atlantic Ocean an kânna kawngah hian mi sang tel an thi tawh a ni.
Nikum khan mi 47,000 dawnin tuipui kânin Canary Islands hi an thleng a. A tam ber hi Mali, Senegal leh Morocco atanga lut an ni a, Mauritania atanga lawnga kal an ni tlangpui.
Spain-a lut zingah hian naupang, an nu leh paten an kalpui loh pawh tam tak an awm thin.