Mizote hi thil intihhmuh ching tak mai kan ni a, kan bula mite’n an tih ang apiang hi kan ban ve nghal thei mai zel ni hian a hriat thin. Vaihlo leh a kaihhnawih heti tak maia kan ti nasate hi a makin, a rapthlak tak zet a ni.
Vaihlo that lohzia leh hriselna atana a pawi theih zia hrereng chungin nasa takin kan la tilui tang tang thung a, thangthar zingah la tithar an awm reng bawk. Mak tak a ni.
Vaihlo leh a kaihnawih hian natna hrang hrang min thlen thei a, a natna thlen theih leh hriselna a khawih pawi theihzia hrereng chungin kan bansan duh chuang lo a, vantlang zinga meizu khu luai luai kan la tamziate hi i chhut ngai em? Pawi nasa tak kan khawih zawk asin.
Vaihlo han tih hian meizial, kuhva, tuibur leh heng atanga siam thil dang dangte hi a huam vek a, hengah te hian hriselna atana pawi thei tur hlauhawm tak tak a awm a, khawvel pawhin a buaipui mek hi kan ram zimteah hian nasa takin kan buaipui zual a va ngai em.
Zirchianna thenkhata a lan dan phei chuan thil thenkhatah India rama cancer vei tam berna kan ni a, a chhan pawh zuk leh hmuam ti nasa kan tam vang a ni. A zahthlakin, ringtute tih atana mawi lo khawpin he vaihlo leh a kaihhnawih hian min run a, kan hneh a, thapui thawha kan tan a va ngai tawh em.
Kohhran thenkhat chuan zuk leh hmuam tite chu pulpit tlang an lawn an phal tawh lo hial a, kohhran dangte pawh hian zawm ve thei se a tha hle. Kan rinna kawng atanga thlir pawhin zuk leh hmuam tite tan ngat phei chuan taksa sawisa kan nihna ringawt pawh hi pulpit tlanga din phak lohna tham a ni.
Vaihlo leh a kaihhnawih ho hian mihringteah thatna engmah thlen a nei lo a, kan kam hlei vanga ti mai mai kan ni bawk. Kan thalaite zingah zuk leh hmuam leh vaihlo leh a kaihhnawih tichak tlat kan la awm fote hi inenfiah ila, a that lohzia inzirtir lam uarin, hemi atan hian sorkar pawh hian chak zawkin hma la mawlh teh se. He lama hnathawktute leh thahnem ngaia veitute hi duat zual ni ngei se, kan ram hmalam hun hi a thim zel loh nan zuk leh hmuam bakah, vaihlo leh a kaihhnawih i do zel ang u.