Mizoram football inelna ngaihhlut hlawh bera chhal ngam, YMA branch hrang hrangte inelna, LBS Suzuki 22nd Inter Branch YMA Football 2025 chu final lut a hriat ta a, Inrinni hian Aizawl khawpui branch ve ve, Bethlehem Vengthlang leh Republic Veng ten an khel ang.
YMA branch 154 telna inelna hi Zirtawpni khan Rajiv Gandhi Stadium, Mualpui, Aizawlah semifinal pahnih khelh niin BVT-in Armed Veng South chu 1-0-a hnehin Republic Veng hian Durtlang chu hun pek belhah 3-2-in an hneh bawk.
Semifinal inkhel hmasa zawkah hian BVT tan K Lalramzauva chuan minute 27-ah amah vengtu a bum hnuah a goalkeeper-in a khar kim loh laiah thunin hei hi final luh nan a tawk.
An si phurh sut tumin Armed Veng South-in an bei let nasa a, hun tawp dawnah goal pawh an khung a, an si phurh an sut ngei pawhin an inngai hman a; mahse, offiside tiin hnawlsak an ni a, a vawi khat nan champion an tumna chu a tlawlh ta a ni.
Semifinal hnuhnung zawkah Republic-in goal hniha hma an hruaina an hum tluan zo lovin hun tawp dawnah si hnih an chhuah a, hun pek belh ngaiin an khel a. Hun pek belhah pawh a tawp tep tihah chakna goal an thun ta hlauh a ni.
Champion tawh zinga quarterfinal lut awm chhun, Republic hian Laldanmawia’n minute 12-a goal hmahruai a thun hnuah goal a luh belh lawk lo va, minute 83-ah F. Lalrinpuia (Valpuia) freekick hmanga thun belh lehin tlang ngei turin an lang hman.
Mahse Durtlangin bei letin Matthew Lalhmangaihzuala’n minute 87-a si khat a sut then hnuah Joseph Vanlalhruaia’n minute 94-ah thun belhin an sut zo va, Republic an hawihai hman.
Extra khelhtir an ni a, hun a tawp hnai tawh a, hun pangngai phei chu a zo tawh a; mahse, C Lalhriatpuia hun a thleng a, ama hlawh chhuah chu minute 124-ah a chhuih lut a, Durtlang tan sutna hun a awm tawh lo, 3-2-a cakin Repubic-in final an lut.