Kings & Prophets Promotions chuan NBE TATA MOTORS CLASH OF THE STARS 2025 chu May 30, 2025 (zanin) dar 7:30 hian LPS ARENA-ah a buatsaih leh dawn.
Clash of the Stars hi Professional and Exhibition boxing event niin, kum 2022 khan a vawikhatna’n hlawhtling taka buatsaih a lo ni tawh a. Hemi tum hian Mizo rapper lar G’nie leh film star Papuia Pachuau ten professional boxing an khel a ni.
Kumin hian show changtlung leh hmuhnawm zawk mipuite chhawp chhuah ngei tuma inbuatsaihna kalpui mek a ni a. Mizoram boxing khawvela bûk rit tak tak inhnek hmuh tur a awm dawn a:- LALRINSANGA ‘Sangtea’ TLAU leh “Thai boxer Poon BBN” chu main event-a inhnek tur an ni a. Sangtea Tlau hi Mizo zinga World Boxing Champion kan neihchhun a ni a, hun engemaw chen a chawlh hnu-a a inhnek leh hmasakna ber tur a ni. Sangtea tum tur Thai boxer hi record tha tak neiin a coach pawh Thailand tana Olympic boxer lo ni tawh thin, an veteran pakhat a ni.
Tin, Co Main Bout atan Mizo boxing ngaina tuten a inhnek kan enchak rawn JOHN KENTY VANHLIMPUIA’n feet 6 leh inches 2-a sang, Russian boxer, Mikhail Vetrila, experience nei tha tak chu a hnek dawn bawk a ni.
Celebrity exhibition match hmuh tur a awm tel dawn bawk a, DREW PACHUAU leh RALA KONE te an rawn inlan ang. Drew Pachuau hi In-House Production neitupa leh host thin kha a ni a, tunhnaia Mizo filmmaker hlawhtling ber te zinga mi a ni. A tumpui tur RalaKONE pawh hi Film Actor leh E-Gamer lar a ni a, Mizo E-Gaming community-ah chuan a hming lian ber pawl niin, Mizoram aiawh te pawha lo chhuak tawh thin a ni.
Anni bakah hian Mizo boxer tha tak tak pali dang inhnek tur awmin, an zinga pahnih hian Meghalaya boxer an hmachhawn ve thung dawn a ni.
Inhnek turte chu:
Hlubawiha vs Johnny Nongrum (Meghalaya)
Denis vs Franky Momin (Meghalaya)
Enkawltira vs Eric Curtman
Zanin hian Youth Icon Taitea leh Mizo Idol Hmangaihi ten mipuite zaiin an awi dawn a, Lil Kiki te pawh Rala entrance-ah an zai dawn bawk.
A hmuna enna ticket leitu leh YouTube livestream enna tur lei zawng zawngin ‘giveaway’ dawn theihna chance in ang vek an nei dawn a ni.
Giveaway tur hi
- Pakhatna (1) TVS NTORQ emaw iQube
- Pahnihna (2) iPhone 16
- Pathumna (3) Haeir Google Smart TV 50 inch… te niin, giveaway pakhatna dawngtu hian KC TVS ah petrol scooter NTORQ emaw electric scooter iQube a duh zawk a thlang thei dawn.
YouTube Livestream hi LailenTV YouTube channel Rs 199-a join in a en theih dawn a. A hmuna en turte tan online-in, www.triket.in ah emaw, ticket counter NBE Tata Motors Showroom, Khatla, Aizawl Hospital bul leh Jack & Jill Mini Store, Zarkawt ICICI Bank bulah te cheng Rs 300 leh Rs 500 in lei tur a awm a, a hmunah ticket hi lei theih a ni bawk ang.