- Dr. C. Lalrampana
A KAMKÊUNA
Kum 1987-a Japan atanga mithiam rual lokalte khan Mizorama mi cheng zat an zawt a, khatih lai khan nuai sawm (10) vel chiah kan la ni. Kan tlem an ti deuh nge? “Khaw khatah awm vek ula in changkang ngawt ang” an ti ta daih a; kan sawrkar Official-te kha an hawihai nasa hle! Tun dinhmunah Aizawl khawpuiah Mizoram pumpuia mihring zaa 80% vel an cheng mek anga chhut theih a ni, kum 2011 chhiarpuia a lan danin Mizoram pumpuiah khaw 829 awma chhut a ni a, tunah phei chuan 837 a tling tawh hial. State tereuhte si thingtlang khaw hrang hrang ngah pawl tak kan ni awm e. Lungnglei khawpui atanga km 66-a hlaa awm Vuakmual chu Mizorama khaw tê ber niin in 40 vel chauh an ni. Hetih lai hian Aizawl khawpui erawh kan tâwt mep mep hle. Veng lun laiah phei chuan bim leh ban insi deuh thupin in kan saa, kan rilru erawh km 100 dan vela inhlat kan ni lawi si a nih hmel? Thingtlang, state dang leh ram dang atanga Mizorama lo lut rêng rêngin Aizawl khawpui an pan khawm zel a, kan hmunhma erawhin a tlin tawh ngang si lo. Hei vang hian hmun dangah khawpui thar dang din kan mamawh takzet ta a ni.
MIZORAM CM-IN A NGAIHNA A HRIA
Tuna kan CM ni mek Pu Lalduhawma hi eptu pawl MLA a nih lai khan eptu MLA tha ber, awmze nei ber, thil chhinchhiah thei, document vawn that kawnga tluk loh rim nam, aw thum tha, thusawi dan thiam, qualification sang tak nei duah ni lem lo mah se, mi thluak tha a ni a, rorel lai party MLA-te er rawn tham; eptu MLA hlawhtling tak, rorel lai party MLA rual 12 laiin an hêk avanga speaker ban hial tawk leh awm chhun a ni a. Eptu party a nih lai pawha CM ni tura duhtu ngah ber thin tunah a lo CM ve ta. A CM hnuah faksel a tawk nasa hle. A ni lah taka party 6 infinkhawm an nih avangin ZNP hlang Ministry ang chuan a duh ang a thawk thei lo tih erawh hriatthiampui a ngai. Chuti chungin a theih chin chinah chuan a thawk tha thawkhat hle niin a lang. Duhthusam erawh chu a ni thei bik lo. Eptu pawl hruaitulu atana a itawm ang êm kha chuan rorellai party Ministry CM atan erawh duhthu a Sam vek bik lo hle. Mahse, CM thahnemngai tak, ram development lam public & pvt. Sector lama ngaihtuahna seng thin a ni tih chu a taka hmuh theihin a awm a, a lawmawm takzet a ni.
NITI AAYOG-AH CM-IN ENGE A THLEN?
Tun hmaa Planning Commission thlaktu mek chu National Institution for Transforming India (NITI Aayog) hi a ni. Prime Minister Narendra Modi chuan May 24, 2025 zing khan Bharat Madapam, New Delhi-ah Niti Aayog Governing Council meeting vawi 10-na a kaihruai a, State 24 leh UTS 7 aiawhin Chief Minister leh Lt. Governor-te an tel. Kumin thupui atan Viksit Rajya chu Viksit Bharat@2047 tia thlak a ni. PM hian Niti Aayog-a governing council meeting vawi 10-na kaihruaiin Viksit Bharat vision chu Viksit States kaltlangin a thleng thei a. State, district leh khawtin hian Viksit Bharat @2047: a pawimawh thu te, kum 2047 hmain India ram hmasawn tak neih theihna tura hmalak tum tur a ni a ti. PM chuan state-te chu international visitors hipna tur leh tualchhung economy tichak turin global-standard tourist destination pakhat theuh siam turin a ngen bawk.
Niti Aayog chu investment hipna tur ‘investment-friendly charter’ buatsaih turin a ngen a, global investor-te chuan India ram hi an ngaihven hle tih a hmu a, state-te chu he hun remchang hi hmang tangkai turin a fuih a ni. Tui resources hman tangkai theihna turin state level-a lui grids siam turin a fuih a, khawpui lian zel tur, Tier 2 leh Tier 3 Cities-a khawpui ruahman lawksa turin a phut a. Tin, thalaite chu emerging sectors lam hawia skilling leh training an neih theih nan a ngai pawimawh ber a ni a ti. India’s Nari Shakti 2019 chakna nasa tak a neihzia a sawi uar hle bawk. He meeting-ah hian Mizoram CM pawh telin Chief Minister Pu Lalduhoma chuan thu sawiin hengte hi a tarlang :
- Operation Sindoor hlawhtling taka neih a nih avangin Prime Minister Pu Narendra Modi chu lawmpuina a hlan a. Mizoram mipuite’n kan thlawp tlat thu a hrilh.
- Tun hnaiah Mizoram chu fully literate state-a puan a ni a. Mizoram chu chhawr tlak mihring (human capital) lama a inbuatsaih nasatzia hei hian a tilang.
- Unemployment rate hi 2.2 % a ni a, workforce-ah hmeichhiate inrawlhna chu 45% niin Skill lamah pawh kan duai lo hle a. Khawvel huap inelnaah India aiawh thei khawpa tha kan nei.
- NITI Aayog State Support Missions kaltlangin hma lakna chak takin kan kalpui a. Viksit Bharat 2047 kan thlen theih nan Department tinte ruahmanna (action plan) thehluh a ni a, Heng behchhan hian Vision Document kan buatsaih mek a ni. Reiloteah NITI Aayog-ah rawn thehluh a ni ang.
Viksit Bharat 2047 atana kan hmalakna langsar tak chu Bana Kaih Scheme a ni a. Ram hmasawnna atana thawhpuitlak (progress) partner te chu collateral free loan nuaih 50 thleng kan pe thei a, an thawh that dan a zira interest zaa za free kan pe ang. Tunah hian chutiang thawhpui chu a thawh khat nan mi 517 kan thlang fel tawh. Central scheme-te nena kaldun zel tura duan a ni.
- Kan farmer-te tan Market Support System tha tak kan kalpui a. Kan entrepreneur-te tan hmalakna tur remchang leh hamthatna kan siam a, kan innovator-te tan grassroot competition kan buatsaih bawk. Competition hmasa ber atangin mi 40 chu grassroot innovators-ah kan puang a ni.
- Infiamna lamah theihna sang tak kan thalaiten an nei tih kan hriat avangin naupang talent neite zawn chhuaha, chher puitlinna tur Empowering Mizoram Sports kan kalpui mek.
- Investment Policy tunlai leh tha zawk kan siam thar a, kan ITI te chu Industry liante nena inthlunzawm chungin kan thuam tha chho mek. He mi kawngah hian NITI Aayog leh Ministry of Skills & Entreprenuership Development-ten thawhpui tur Industry tha tak tak min dappui se a lawmawm hle ang.
- Mizoram mipui zatve aia tam hi khawpuiah kan cheng a. Khawpuia cheng zaa 80% hi Aizawlah an cheng mek. Chuvang chuan Aizawl hi a tâwt êm êm mai a. Kan thalaite hi Primary sector atanga Industry leh Service sector lama tam zawka an luhna tur kan dap ngei ngei a ngai a. He mi kawnga kan mutan kheng thla turin khawpui thar, mipui nuai 10 atanga nuai 15 vel khawsakna tur “Thenzawl-Peace City” din kan duh a ni.
- Ministry of Housing & Urban Affairs chuan min thawhpui (support) tha a, an chungah kan lawm hle.
Prime Minister Pu Narendra Modi kaihhruaina hnuaiah NITI Aayog -te tanpuina hmu zel chungin kan ram hi ram changkangah kan siam ngei ang, tihte a ni
TLÂNGKAWMNA
Kan CM thahnemngai tak hian Mizoram tana thil tha tak tak tur NITI Aayog Council Meeting-ah hian a thlen a, alawmawm takzet a ni. Heng a thu thlente zinga kan mamawh êm êm leh pawimawh tawp khawk nia lang chu No. 8-na-”Khawpui thar, mipui nuai 10 atanga nuai 15 vel khawsakna tur “Thenzawl-Peace City” din kan duh a ni.” a tih tak mai hi a ni. Aizawlah hian kan tâwt tawh takzet a, khawpui thar dinna tur hmun rem êm êm CM bial chhungah THENZAWL khawpui kan nei reng a, mihring nuai 10-15 vel awm theihna tura ruahman theih a nih ngat chuan Aizawl khawpui tâwt lutuka inêk beng tlurh reng hi a thawl huai ang a, ‘Switzerland of the East’ ang maia khawpui mawi tak leh nuam tak tur “Thenzawl-Peace City” kan nei tak tak thei a nih ngai chuan “Thenzawl chu a lum êmai, ka awm peih tawh lo” tia pem chhuak tawh tamtakte pawhin pem letleh an châk ngawih ngawih ang a, inhmun lo ram an chang tawh dawn si lova, a hnaivaiah rel chawlhhmun leh thlawhna tumhmun bakah tuna Dilpui kamah sawn seaport tha tawk a awm hunah phei chuan Aizawl khawpui hi khawram chhimbuk rauhsan ang maiin a reh duk tawh mai dawn a ni. Kan CM neih tawh zingah khawpui thar din duhna thinlung tak tak nei chunga sawrkar laipui dawrtu awmchhun nia lang mipui sawrkar, mipui CM hian NITI Aayog meeting hmaa sawilan ringawt hi duhtawk mai lovin hlawhtling ngei turin thapui thawhin nawr zui ngat ngat se a van duhaawm tehlul êm! A tul a nih phawt chuan Social Activist ropui tak, tunlaia kan Zorama inti social activist chawp mai maite ang ni lo, Anna Hazare-a’n April 5, 2011,-a Jantar Mantar, New Delhi-a chaw ngheia eiruk dona bill Jan lokpal bill ngiata nawrhna a kalpui ang khan Zorama rorelna dik beiseitute chuan Aizawl Raj bhavan gate bulah ‘Thenzawl-Peace City’ nghah chhuah nan chaw ngheiin nawrh kan huaihawt ve mai tur alawm! Chuvangin, kan sawrkar hian theihtawp chhuahin khawpui thar din tur hian sawrkar laipui nawr char char se, a hnungdaltu Zoram lanu valrual thangthar tam tak an la awm a ni tih hre rengin zam lovin hmalam panin kalzel teh se.