Inrinni zanah Paris Saint-Germain leh Italian club Inter Milan chuan Munich khawpuia Allianz Arena-ah UEFA Champions League final an khel a, si nga faia French club chakin nomawi an la a, champion team lak tur an trophy hi bih chiang thung ang.
Champion team chu Europe khawmualpuia football thiam ber club tia sawi theih an ni a, intihtheihna tham a tling a. 2024/25 champion team hi $ maktaduai 98.8 vel zetin an hausak belh dawn bawk.
Tuna UEFA Champions League trophy an hman mek hi design pangana a ni tawh a. Trophy hmasa chu Europe khawmualpuia club hrang hrang inelna lian bera Real Madrid an chet that em avangin neih hlen turin an pe a, hei vang hian 1968-ah khan design thar an hman phah a ni.
UEFA chuan dan ding lai an nei a, ‘Champions League title vawi nga la thei emaw, a zawna vawi thum la thei emaw chuan trophy chu an nei hlen thei ang’ tiin thu an lo dah tawh a. Real Madrid chu hetiang ti thei hmasa ber an ni a, a hnu lamah Liverpool, Ajax, Bayern Munich leh AC Milan te pawh nei hlen thei turin an champion ve leh bawk a. Heng club pangate hian Champions League nomawi hi an kawl hlawm a ni.
Tun hnuah chuan UEFA-in trophy tak tak kha an kawl a, a ang chiaha siam chu champion club hi an kawltir ve thin.
Champions League nomawi hi Swiss tlereuh siamtu, Jürg Stadelmann siam niin, silver tha chi hmanga siam a ni a. A san zawng hi 73.5 cm niin, 7.5 kg a rit a ni a. A siamtu, Stadelmann hian siam zawh nan darkar 340 chhung zet a hmang niin a sawi.
Club football huangah chuan trophy ngaihhlut hlawh ber tia sawi theih ni mah se a hlutna erawh rin ang he hu a ni lem lo thung a. Thawmhnaw siamtu, Canterbury-in an sawi dan chuan UEFA Champions League nomawi hlutna hi $15,000 (Rs. 12,83,384) vel chauh a ni a, trophy dangte nena khaikhin chuan hlu deuh tia sawi theih chu a ni chiah lo.
FIFA World Cup hi trophy zingah chuan hlu bera ngaih a ni a, rangkachak (18-carat) a siam niin, a hlutna hi $ maktaduai 20 (Rs. 1,71,11,79,000) vel zet niin an chhut.
Indianapolis 500-a chak ber hnena an hlan, Borg-Warner Trophy pawh silver tha chi, Champions League trophy an siamna ang thoa siam niin, 1.625 metre-a sang a ni a, 45 kg-a rit niin, a hlutna chu $ maktaduai 1.3 (Rs. 11,12,26,635) vel a ni a. NHL playoff champion hnena an hlan, Stanley Cup hlutna pawh $650,000 (Rs. 5,56,13,317) vel a ni.
Nomawi dangte nena khaikhin chuan a hlutna hi a sang lo a ni mai thei, chutihrual chuan mi thinlunga a hlutna erawh chu a sang viau thung a. Nomawi man to lo mah se, sum hi kawng hrang hrangin a chhawm tel a, sponsor te, fakna te leh thil dang atangin champion thei team chuan pawisa an lak luh nasat phah hle.
Europe khawmualpuia football league hrang hranga tha zualte inelnaa champion thei nih chu intihtheihna tham a tling tak zet a, football khawvela ngaihsan hlawh loh theih lohna a ni a, Europe khawmualpuia roreltu an ni tlat a ni.