Aizawl: Tun hnai ruahsur nasa avanga Mizoram hmun hrang hranga chhiatna thlenga nunna chan chhungte hnenah ex-gratia Rs nuai 4 an ruahman sak nghal zel tur thu Disaster Management & Rehabilitation (DM&R) department Minister Prof Lalnilawma’n a sawi.
Inrinni khan DM&R Minister Prof. Lalnilawma hovin State Emergency Operation Centre (SEOC), Directorate of Disaster Management & Rehabilitation, Chawnpui, Aizawlah chhiatna hrang hrang thlengte a tul angin chhawmdawl hna kalpui dan tur ruahmannate an siam a. He hunah Prof. Lalnilawma chuan, Mizoram hmun hrang hranga khuarel chhiatna thleng chu pawi a tih thu sawiin, sorkarin DM&R department kaltlanga chhawmdawl hna theihtawp chhuaha an kalpui thu a sawi.
DM&R Minister chuan chhiatna tawk chhungkuate a tawrhpui thu sawiin, sorkar atanga tanpuina awm thei ang angte leh India khua leh tui, nunna chan chhungte hnenah Ex-Gratia Rs nuai 4 an ruahman sak nghal zel tur thu a sawi.
Prof Lalnilawma chuan, chhawmdawl hna thawhna kawngah zo nun ze mawi, tlawmngaihna hmuh tur tam tak awm chu thlamuanthlak a tih thu a sawi a. Khawtlang, tlawmngai pawl leh mi mal, mahni sahimna dah bo a, midang harsatna chhawk tur a che chhuak thinte chu Mizo nih tinuamtute an nih thu a sawi a. Mahni zawn theuh a chhiatna thleng thei venpuitu nih tum tur leh DM&R Department tha tichaktu ni turin, a tul apiangah deparment-a thawktute chu be pawp thin turin mipui a chah bawk.
He hunah hian DM&R Secretary K.Lalrinzuali, Joint Secretary Zarzokimi, Director R.Vanrengpuia leh DM&R a thawktute an tel a. Aizawl district chhunga chhiatna thlenna hmun hrang hrangte an tlawh nghal a, an huamchhung theuhah khawtlang hruaitute leh tlawmngai pawl hruaituten an tawiawm a ni.