Aizawl: May 30, 2025 zan dar 10:45 vela Lawngtlai Bazar venga chenna in pathum leh Chandmary-a building-a in chimin a chim hnan mi pathumte chu dam taka chhanchhuah an ni.
Zirtawpni kaltaa ruah sur nasa avangin Lawngtlai Bazar veng leh Chandmary veng inrina laiah chenna in chim zinga pakhat chu Assam-type niin, a dang zawng chu RCC a ni a. In chimah hian a tam zawk chu an tlan chhuak hman a ni.
Bazar vengchhunga in chim hi Vanlalhlupuii Fanai In, Gilead Drop-in-Center leh Hotel, B. Vanhnuailiana leh C. Lalchungnunga te in niin, Chandmary Vengchhunga in chim hi C. Nihluani, in sak mek ve ve F. Rothuama in leh leh F. Lalnithanga in te an ni.
Chhanchhuah hna hi 3rd IR Battalion, Thingkah; Assam Riffles, District Disaster Management & Rehabilitation leh Quick Respone Team, Lawngtlai-te bakah Central Young Lai Association (CYLA) member-te’n an thawk nghal a. NHIDCL leh ABCI ten an hmanrua neih ang angte an lo thawhchhuahpui bawk.
The Zozam Times thudawn danin, in chim hi a chet deuh thin vang leh in chim kara tangte tanna pawh tura kawng sial a harsat deuh avangin chhanchhuah hna hi thawh chak hleih theih a ni lo.
Zirtawpni zan leh Inrinni nilengin chhanchhuah hna hi thawh niin, Inrinni zing dar 10 khan Bazar veng-a Vanlalhlupuii Fanai In, Gilead Drop-in-Centre leh Hotel bakah mi malin an luah atangin Hotel-a thleng, Rakhine lam mi nia hriat pakhat chu dam taka chhanchhuah a nih hnuah, Rakhine lam mi bawk nia hriat pakhat chu dam taka chhanchhuah leh a ni a. Inrinni zan dar 7:50 khan mi pakhat chu dam taka chhanchhuah leh a ni.
In chimin a chim hnante hi chhanchhuah vek tawh niin, District Hospital, Lawngtlaiah enkawl mek an ni.
In chim hian NH- 2 kawngpui a hnawh ping vek a thenfai hna hi thawh nghal a ni a. Lawngtlai Bazar veng leh Chandmary atanga lawngtlai Electric veng lam panna pawh he thu buatsaih lai thleng hian kaltlang theih a ni lo bawk.