Kar liam ta tir lam atanga Nigeria lailia tui lian avanga thi chu mi 151 an tling tawh a, chenna in tam tak tichhiain mi sang tel baihvaiin an awm phah mek.
Niger State Emergency Management Agency (Nsema) chuan tui lian hian Mokwa khua a thlen veleh hnuah thi zat hi 115 atangin an pung dawrh tih an sawi.
Nsema thupuangtu chuan in 500 chuanga cheng mi 3,000 chuang a tibuai niin a sawi a. Chhungkaw thenkhatah chuan an chhungkuaa mi pahnih atanga panga thleng thi pawh an awm tih a sawi.
Agency hian River Niger lian hian a thlang zel a thlen thlak hunah thi pawh an pung thei tih a sawi bawk.
Tual chhung thuneitute chuan mi 11 chhanchhuah an nih thu leh damdawi inah dah luh an ni tih an sawi.
Nsema chuan Mokwa-a Tiffin Maza leh Anguwan Hausawa district-te chu a tuar na zual niin a sawi a. Mokwa-a district hotu, Muhammad Shaba Aliyu chuan kum 60 chhunga tui lian an tawrh nat ber niin a sawi.
“Sorkar pawhin min ngaihsak ngei ka beisei,” a ti a. Hetih rual hian chhiatna thleng a tam em avangin thuneitute hi an che sawt thei bik lo.
Mokwa hi Nigeria chhim leh hmar intawhna, River Niger lam maia awm a ni a. Hmar leh chhimthlang inpawhna lei pawh tui lian hian a la a, lirthei tam tak a tangkhang.
Nigerian President Bola Tinubu chuan ‘emergency leh security agency-te chu mi zawn leh chhanchhuah hna thawhnaah a tul ang zawng zawng ti turin’ a ti.
Nilaini leh Ningani khan heng lai hmunah hian ruahpui vanawn a sur chiam a, hei hian tui lian hi a thlen a. Nigeria-a fur hi a intan deuh chauh va, April leh October inkar vel a ni thin.
Thuneitute chuan an rama state 36-a 15 velah chuan ruah hi sur thei niin an sawi lawk.