May 30, 2025 atanga chawl mang lo va ruah sur avangin Mizoram district hrang hrangah mi pali-in nunna an chan tawh.
State Emergency Operation Centre (SEOC)-in a chhinchhiah danin, May 31, 2025 tlai dar 4 thleng khan tun ni hnih chhunga Mizoram chhunga ruah sur nasa avanga chhiatna thlengah mi pali-in nunna an chang tawh a. Nunna chan te hi Serchhip district-ah mi pakhat leh Champhai district-ah mi pathumte an ni.
Ruahsur nasa avanga chenna in chhia/in chim hi 56 awmin, Serchhip district-ah a tam berin chenna in 41 chhia/chim a awm a. Lawngtlai district-ah paruk, Hnahthial district-ah pathum, Mamit district-ah pahnih bakah, Aizawl, Champhai, Saitual leh Khawzawl-ah pakhat theuh a awmin, a vaiin 56 a awm.
Chenna in rauhsan zat hi Serchhip district-ah tam ber lehin, 55 a awm a, Hnahthial district-ah pali, Lunglei district-ah pahnih, Aizawl leh Saitual-ah pakhat ve ve a awmin, a vaiin 63 a awm a ni.
Leimin zat/lei tawlh zat hi Serchhip district chhungah tam ber lehin, 96 a awm a, Lunglei district-ah 20, Hnahthial district-ah 11, Aizawl district-ah pakua, Mamit district-ah panga, Lawngtlai district-ah pathum, Saitual, Kolasib leh Khawzawl-ah pakhat theuh a awm bawkin, leimin/tawlh awm zat hi hmun 147-ah a ni.
Serchhip district chhungah leimin/lei tawlh avanga kawng dan hi hmun 48-ah awmin, Hnahthial district chhungah hmun parukah, Aizawl leh Lunglei district chhungah hmun panga ve ve, Lawngtlai leh Mamit district chhungah hmun pahnihah leh Kolasib district chhungah hmun pakhatah kawng dan a ni bawk.