Aizawl: MNF chuan tun hnai ruahsur nasa avanga Mizoram hmun hrang hranga chhiat tawkte an tawrhpui thu sawiin tanpuia thawk chhuakte avanga Zonunmawi vul zel chu lawmawm an ti.
Nimina an thuchhuahah MNF chuan khuarel chhiatna chi hrang hrangin Zoram dung leh vang a tuam mek karah vanduai nunna chân an awm chu pawi an tih thu tar langin, lusun chhungte a tawrhpui thu an sawi a. In leh lo, bungrua chân te, mahni chenna hmun luah ngam loh avanga inthiar chhuak te an awm zel a, thlaphang manganga an awmnaah Pathian awmpuina leh tihchakna chang ngei se an duhpui tak zet tih an sawi.
Chhiatna thleng mek leh harsatna lo la thleng thei lakah Mizoram sorkarin a tih tur a tihna kawngah tanpuitu ni zel tur leh, a tih tur a tih loh palh pawh finchhuaha kawhhmuhtu ni zela, chhiatna tawh mek laka mipuite an him lehzualna tura an awmna hmun theuha theihtawp chhuah zel turin mipui an chah.
Chhiatna thleng tawh leh thleng mek karah tanpui ngaite tanpui thin hnam an nihna a lang zel tih sawiin MNF chuan, puih ngai puitu, hnem ngaite hnemtu leh thlamuanpuitu an awm chu thlamuanthlaka, mahni theihna zawn theuha thawk chhuakte fakin, chhuanawm a tih thu an sawi a. Mi thil phal leh inpea thawk chhuakte avanga Mizorama zo nun mawi vul zel chu lawmawm an tih thu leh a tivul zeltu ni theuh turin, Zoram mipui zawng zawngte an chah tih an tar lang.