Aizawl: BJP Mizoram chuan tun hnaia ruah sur nasa avanga Mizoram chhunga chhiatna hrang hrang tuarte tan sorkar laipui atanga tanpuina hmun a nih theih nan theihtawp an chhuah tur thu an sawi.
Nimina thuchhuah an siamah, tun hnaia khuarel chhiatna lo thleng avanga nunna bakah chenna in chante, kuthnathawktu tam takin an thlai thar tuiin a chim avanga harsatna tawkte chu an tawrhpui thu an sawi a. Mizoram leilung ngheh tawk loh vangin in sakna hmunte chu mithiamte kaihhruaina leh hmun rem leh nghet zawk an thlan thiam a pawimawh tih sawiin, nunna hlu tak an chan thinna tamtak chu pumpelh theih te pawh a awm ngeia an rin thu an sawi.
BJP Mizoram chuan, chhiat tawhna lo thleng avang hian Mizo tlawmngaihna hlu tak lo par chhuak thin chu, hnam dangte laka nunze mawi tak leh Kristian an nihna anga midang tana rawngbawlna anih avangin chhawmnung zel tura an duh thu an sawi a. Mizoram chhunga khuarel chhiatna hrang hrangte chu National President JP Nadda leh National hruaitu dang te nen inbiain chanchin an thlen tur thu leh, Central atanga puihna hmuh theihnan theihtawp an chhuah dawn niin an sawi.