- Zothansangi Hmar
Mizo hnam hi hnam rinawm, buh seng laia thenawmte buh vui, mahni lo lama lo uai lut pawh dah let thlap thin, kawngka pawh kalh ngai lo hnam kan ni thin a. Nimahsela Politics kan hmelhriat hnu, District Council leh Union Territory hunlai atang tawh khan han inen let ila, mi dang tana tha duh aia mi dang kher ching, huamhap leh mahni tanghma ringawt haite pawh kan ang zo ta.
Sawrkar a inthlak apianga mi tam tak buaipui chu contract hna a ni a, kan rama infrastructure hrang hranga kan neih ho hi chutianga thawh chu a ni a. Mimal in tur kan saka kan uluk em em laiin sawrkar suma sak a nih avanga ei theih tur ringawt kan ngaihtuah ta mai hi a mak a, a Mizo lo a, a Kristian lo bawk em em a ni. Contract hna a nih chuan hmuh tuma bei nasa sa kha hralh (Sublet) leh tuma buaiah kan tang fo a, hei hi chu tu sawrkarah pawh thil thleng vek niin a lang. Contract pek chhawn hi contract inremna an siam dan a zir a ni a, mahse a hnathawh tur (project) a zirin hralh chhawn phalna provision awm leh awm lo a awm niin a lang a. Dan anga hralh chhawn pawh chu lo ni ta reng se, kawnglakah sum leh material eng emaw zat a bo thlau thin a, chu chuan project tangkai tur tak tak a ti hlamzuih thin. Hemi chungchang kher hi chu sawrkar hnathawkte pawh hian an sawi thui duh ngai lo hle niin a lang a, ualau taka contract hralh hi kan tam telh telh emaw tih tur a ni. Tin, sawrkar thar kan neih apiangin hemi contract ualau taka hralh chhawn chungchangah ah hian tu sawrkar mah hi an in bei na tak tak ngai meuh lo.
Hemi chungchang hi mipui tam zawk pawh hian kan vei tawk lo hle a, a nih dan tur reng emaw kan ti zo tawh pawh a ni maithei. A chhan ber nia lang chu kan mimal dikna leh chanvo kan hriat tawk loh vang a ni a, contract hna thawh chhiatin a nghawng nasat zia hi a nawlpui hian kan ngaihven lo hle thin. Chutiang kawnga Mizoramin a tawrh tawhna entirna pe ila: Kum 2013 khan Rashtriya Uchchatar Shiksha Abhiyan (RUSA) Centrally Sponsored Scheme (CSS) hnuaiah Mizoram Engineering College, Pukpui, (Higher & Technical Education Department hnuaia mi tur) chu din tum a ni a, project hna thawh nan Rs. 26 crore ( Central leh State in 90:10 ratio) dah a ni a. Chu Engineering College-ah chuan Civil Engineering, Electrical Engineering leh Mechanical Engineering zirnate awm tura duan a ni a, DPR ( Detailed Project Report)-ah chuan piangphunga rualban lote lawilenna tur (Ramp), wheelchair, earthquake resistance (lirnghing laka invenna), tui supply tha tak, a kawng panna tha leh changkang tak, teaching faculty leh a dangte awm tura duan a ni. Nimahsela a taka sak a nih meuh chuan Students’ Boys Hostel-te chu khum pahniha then a ni a, bathroom chhuat, corridor-te leh a chhuatte chu a khi nasain a rualrem lo em em a.
Mizoram Legislative Assembly-a Subject Committee II chuan hei hi en dikin House-ah report-te pawh a pe tawh a, a hmuna chhanna an dawn dan chuan a bul hnaiah lung lakna (quarry) a awm thu leh, a bul hnaiah gelatin hal vanga khi niin an sawi a (Bang erawh a khik phah bawk si lo a ni awm a). DPR-a an ziah anga lift-te, ramp leh a panna kawng, electric leh tui connection-te chu mumala hmuh tur a awm lo a, a hlawk lai, a building va sak uaih mai kha kan tuipui lai ber chu niin a lang. A tawi zawngin, he Engineering College, kan ram tana rohlu ni tur leh thalaite hmasawnna nasa taka thlentu tur chu tun thlenga chhawr tangkai lohin a awm a, a pawi vawng vawng a ni.
Assembly-a Public Accounts Committee report behchhan bawkin entirna dang pe leh ila: Mizoram sawrkar Department hrang hrang sum hman dan audit-tu, Comptroller General of India Audit Report-a, a landan chuan kum sawm chuang liam taah khan Ministry of Tourism chuan State Institute of Hotel Management (SIHM) din nan Rs. vaibelchhe 10 a rawn a sanction a, Tuirial kawng, Bung Bangla-a sak tura ruahman a ni a. A sak hna chu kum 2007 leh 2011 chhung khan thawh a ni a, cheng vaibelchhe 8 chu Academic leh Administrative Building, Boys Hostel Block leh Girls Hostel Block bakah a kawt tual vel siamna atan hman tura ruahman a ni a. Pawisa chu PWD kutah hlanin kum 2013 khan hna an zo a, kum 2015 May thla khan PWD chuan Tourism Department kutah a hlan a. PAC-in a hmuna a zuk tlawh chuan in sak sate chu a awngrawp tawh hle tih an hmu a, Girls Hostel block bik chu Shivalaya Construction Company Pvt. Limited-in kum 2019 atang khan thla tin Rs. 50,000 chawiin an lo luah anih chu! Chei thar leh a ngai nasa hle a, nimahsela a chei thar lehna atana cheng vbc. 2.1 dilna chu sum harsatna chhuanlamin sawrkarin a pe thei ta lo a. Chumi hnu chuan kawng hrang hrang dap a ni a, Trade Promotion Council of India kuta hlan mai ni se tiin thutlukna siam a ni ta a ni.
Ministry-in cheng vaibelchhe 10 pek tura a ruahman atanga vaibelchhe 2 chu zirlaite zirna hmanrua leina atana tih a nih avangin pek chhuah a ni ve rih lo a, hei hi Institute a taka kalpui a nih hnu chauha pek chhuah tur a nih vang a ni a. Kum 2013 khan Tourism Department chuan SIHM a thawk tur hna 22 siam turin rawtna a siam a. DP&AR chuan he rawtna aia tlem post 19 siam a phalsak a. Chu pawh chu sum harsatna chhuanlamin sawrkarin a pawm leh lo a. Kum 2019 khan sawrkar chuan post 32 siam a phalsak na-in Covid-19 vangin sum harsatna chhuanlamin post hi a taka siama hna lak a awm lo a, Tourism Department chuan Ministry kuta cheng vbc. 2 la awm chu dil chhuak turin hma a la lo a, State sawrkar pawhin pek turin ruahmanna a siam hek lo a. Chutiang a nih avang chuan cheng vbc. 8 senga SIHM din tura ruahmanna chu awmze nei loah a chang a ni ber a, thil tangkai tak tur engmah loah kan chhuah leh ta a ni ber.
He’ng entirna pahnih chauh atanga lang ta chu DPR hi sum siam nan chauh kan hmang thin emaw ni tih mai a awl a, a thuin tha tak tak kan siam a. Chumia zir chuan Ministry hrang hrangin cheng vaibelchhe tam tak an rawn release a, nimahsela a lo thlen chuan DPR ang ni loin, component hrang hrang kan thlak danglam leh thin niin a lang. Heng kan ram hmasawnna tura project a thu a tha tak taka a duan mahse contract tih kual kawi avanga mimal hlawkna tura lut leh ta thin hi engzat tak awm ang maw? DPR hi sum hmuh nan, sum sawi chhuah nan chauh em ni kan tih thin? Kan sawi tak ang hian infrastructure project tam tak chu a zuzi a, a infrastructure kan tih chhiat bakah a hmunhma lah chu a tha tha kan thlang bawk si a. Khawi emaw hmun tha takah luah leh mang loh tur in lian pui pui kan sa a, kan ram leh hmunhma tha kan sawisak dan hi chu inen let kan ngai takzet a ni
He’ng thil pamhmai tak tak thleng leh thin hi mipuite hian kan ngaimawha, kan do a hun tawh. Kan veng leh khuaa public infrastructure din a nih dawn chuan lo ngaihven tlang ila; kawng a ni emaw; zirna in, infiamna hmun emaw vantlang zunin tur pawh ni se lo vil ve ila, DPR thlenga hriat ve i tum tlat thin ang u. Chu chu kan right a ni a, tute’n emaw ka theih tak emaw tia an ei mai mai tur a ni lo. Dawra sahbon Rs.10-a kan lei hian chhiah kan pe theuh a ni tih hre rengin mipuite hian heng lama vantlang thil tha kan neih theih na tur hian kan awka hian awmzia a nei thei a ni tih hi hre thar leh ila, Mizo takin, Kristian takin kan ram hi i hmangaih thar leh teh ang u.