Covid-19 thlipuiin na takin min nuai a, khawvel buai lai leh reh thup lai khan keini pawh kan buai a, kan kawtthler thlengin a reh ve thup a nih kha. Kan hriat ngai loh leh kan la tawn ngai loh a nih avangin hriatthiam a har a, hri leng vanga nunna chan an awm tak nual hnu phei kha chuan kan dinhmun a derthawng a, kan chiai a, hlauhnain min man a, kan va buai em.
Kan mithiamte an ngawi mai mai lo a, kut kuangkuahin an thu mai mai lo a, a invenna leh inhmakhua dan, fimkhur dan hrang hrang min hrilh a, kan nunphung a pangngai chho leh tan ta.
Tun hnaiah he hri bawk hi rawn lang thar lehin, a la reh fel hauh lo a, India ramah pawh chhim lam atanga rawn inlar tanin, tunah hian India hmar lam a rawn pan leh mek a, kan ram ngeiah pawh kai an awm leh tak thu kan hria a, fimkhur a ngai thar hle.
Mithiamte chuan a hri hi a muang a, a hma ang em em a chiaina tur a awm loh thu sawi mah se, fimkhur erawh a hma ang khan a la ngai reng a, kan tih loh tur leh fimkhurna tur hrang hrangte kha kan hriat thar a tul a, sorkar pawhin ramdang/state dang atanga lo lut apiangte hi endikna a kalpui thar leh thuai thuai a tul hle mai.
A darh huk hma hian lo fimkhur ila, lo inhmakhua ila, hri leng avanga kan buaina a zual leh hluai hma hian i lo inbuatsaih ngawrh mawlh teh ang u.