India hmarchhaka Assam, Manipur, Tripura, Sikkim, Arunachal Pradesh leh hmun dangah tun hnai ni thum chhunga ruah nasa taka sur kaihhnawiha tui lian leh lei min avangin mi 34 vel thi an awm tawh.
Tui lenna hmuna chhawmdawl leh chhanchhuah hna thawk turin Pathianni khan Air Force leh Assam Rifles koh luh an ni.
Sikkim-ah chuan hmar lamah khualzin 1,200 chuang tangkhang an awm a, Pathianni khan lak chhuah hna thawh tan tura ruahman ni mah se a kawngah lei min thar a awm leh avangin an thulh a, then fai hna thawh leh hmasak phawt a ni.
Ningania Munshithang-a Teesta River-in an chuanna lirthei chawpa a lak khualzin pariatte pawh Pathianni zan thleng khan an chin hriat theih an la ni lo.
Meghalaya-ah chuan district 10-ah sabereka khuangkai leh lei minin harsatna a thlen a. Tripura-ah mi 10,000 chuang tui lian avangin an buai mek bawk.
Assam-ah chuan district 19-a khaw 764 chu tui lianin chimin mi nuai 3.6 chuang an buai phah mek a. Pathianni khan mi pahnih thi awm belh lehin lei min leh tui lian avanga an state-a thi chu mi 10 an tling ta bawk.
Dibrugarh, Neematighat leh hmun thenkhatah Bramhaputra lui chim chin chu hlauhawm chhinchhiahna chung lam a ni tawh a. Lui dang panga pawh hlauhawm chhinchhiahna chung lamah a luang mek bawk.
Assam-ah hian mi 10,000 chuang relief camp siamsakah an khawsa mek.
Union Home Minister Amit Shah chuan tui lenna hmuna sorkar laipui chet chhuahna tur a awm a nih chuan puih a inhuam reng tih a sawi a. Assam, Sikkim leh Arunachal Pradesh chief minister theuh leh Manipur governor te a be tawh.
“An state-a ruah sur nasa lutuk avanga an dinhmun mek sawipuiin ka bia a. An thil tawn mekah puih an ngaih chuan puih theia kan awm reng thu pawh ka hrilh a. Modi-a sorkar hi hmarchhak mipuite tan lungpui angin a ding reng a ni,” tiin Shah-a hian X-ah a tar lang.