Harry Maguire chuan nipui bazar inhawn laiin Manchester United player thahnem tak chu an chhuah a rin thu a sawi.
Season hman zawh takah Manchester United chu an che tha lo hle a, Premier League-ah 15-na ni chungin season an khar a, hei vang hian insiam that nasat an tum hle.
Manager Ruben Amorim chu la awm zui zel tura ngaih niin Old Trafford-a a la awm zel dawn chuan player siksawi nasat a tum hle niin an sawi.
England defender Maguire-a chuan an club chhungkaw boruak a thlirin an player neih sa thahnem tak chu Old Trafford atanga inpu chhuak tura a rin thu a sawi chhuak a. A chhuak an awm nual rual hian player thar pawh an lak luh nual a rin thu a sawi bawk.
“Nipui player inlei theih hun inhawn chhungin kan inthlak danglam nasa dawn hle a, player thahnem tak an chhuah ka ring a, chutihrual chuan player thar eng emaw zat kan lak luh ka ring,” tiin a sawi chhuak a ni.
“Club thuneitute chuan ruahmanna fel tak an siam a pawimawh dawn a, chutiang bawkin thutlukna tha tak an siam theih laiin player-te pawh kan pawimawh em em bawk a ni,” a ti.
Malaysia khawpui, Kuala Lumpur-a ASEAN All-Star an hmachhawn leh chu mi hnua Hong Kong nen an inkhelhin Maguire chu an captain Bruno Fernandes thachhangdawltu niin vice captain a ni a. Saudi Pro League club Al-Hilal leh Fernandes te chu an sawi zawm mek a, Portuguese midfielder hi Saudi Arabia lama a kal a nih chuan Maguire hi captain ni thei dinhmunah a ding a ni.
Chhuak thei tura rin kai zingah Alejandro Garnacho, Andre Onana, Luke Shaw, Jadon Sancho, Antony leh Marcus Rashford te chu an tel a ni.