Aizawl: Mizoram Universal Health Care Scheme (MUHCS) chungchangah Aizawl private hospital te nena an inrem lawk theih loh chhan chu sorkar hmasa lama bat ral sak a tam thin em vang niin Health Minister Lalrinpuii’n a sawi.
ZPM Southern Hqrs., Lunglei in nimina party chhung inkhawm an neiha thusawitu Health Minister Lalrinpuii chuan, Mizote hi pawisa khawl nei hleithei lo khawpa khawsa thin an nih avangin, an boral leh dam loh chungchangah MLA te an tibuai hle thin a, heihi sorkar hian hriaiin sorkar tha nih tumin MUHCS chu kum khat chuang an zirchian hnuah, kumin April ni 1 khan he scheme hi tlangzarh a nih thu a sawi.
Health Minister chuan private hospital-ah pawh Lungleiah chuan Serkawnah MUHCS a hman theih tawh tih a sawi a. Aizawl private hospital-te nen an inrem lawk theih loh chhan chu sorkar hmasa lama bat ral sak a tam thin em vang a ni tih sawiin, tunah chuan nasa taka an inngen hnuin cashless thei turin inbiakna an kalpui reng tih a sawi a, Synod Hospital-ah pawh hman theih tura an inrem thuai a beisei thu a sawi.
ZPM sorkar hmain PHC-te a ruak huai thin a, tunah chuan theih ang anga an hnawhkhah thu sawiin Lalrinpuii chuan, PHC hrang hrangah doctor thar a ngheta thawk tur pakua an lak bakah, NHM atangin doctor 39 an la thar thu leh, Sub-Centre pawh hnawhkhah a semrual niin, 87 chu an hnawhkhah thu leh, Health Worker 100 lak thar a, hnawhkhat leh an tum mek thu a sawi bawk.
Minister zawng zawngin theihtawp piah lama hna an thawh ve tak meuh thu sawiin, mipuite tawngtai sakna leh thlawpna chu an duh tak meuh tih Minister chuan a sawi a. Thil tih harsa leh theihloh a innawr lui tlat an awm thin chu luhai thlak a tih thu sawiin, Minister leh MLA te hi eirulo tura intiam an nih angin, an eiruk ve loh thu leh hlawh ngawr ngawr bak an ring bik lo tih a sawi.