Union Minister of State for Ministry of Road Transport & Highways (MoRTH) Ajay Tamta chuan nimin khan Hnahthial district tlawhin, Samagra Shiksha hnuaia Higher secondary school building sak mek leh NESIDS hnuaia Hnahthial District Hospital sak mek a endik.
School building sak mek a endik zawhah DC Conference Hall-ah Hnahthial district-a Head of Office-te nen inkawmin, Union MoS chuan Samagra Shiksha hnuaia Science leh Commerce stream tana HSS building sak mek dinhmun leh harsatna an tawhte a zawt a. District Education Officer H. Sangthanga chuan harsatna lian tham sawi tur an neih loh thu leh, tun dinhmunah Science stream awmna tur, 4th floor thleng chu sak zawh a nih tawh thu leh Commerce stream awmna tur 5th floor chu tun dinhmunah zaa 60 vel zawh fel a nih tawh thu a sawi.
Union MoS chuan NESIDS hnuaia sak, khum 50 awm theihna tur, District Hospital main building sak mek chu a enfiah nghalin, ward hrang hrang a fang kualin, harsatna an neihte chu thawktute a zawt bawk.
Hemi hnu hian Hnahthial Addl. DC Zothanmawia Khiangte kaihhruaiin Hnahthial district chhunga central schemes kalpui a nih dan an thlir ho vin, R. Vanlalruata, SDC chuan powerpoint presentation hmangin Union MoS chu central schemes hrang hrang kalpui a nih dan a entir a. Union minister chuan scheme kalpui a nih danah zawhna a neihte zawtin, schemes changtu department aiawhten an hrilhfiah a ni.
Inkawmna an neih zawh hian Ajay Tamta chu Aizawl lam panin a chhuak leh nghal a ni.