Rimawi Khawvel editor leh award buatsaihtu PC Lalthakima chu thawhtanni chawhma dar 11:15 khan Aizawl Civil Hospital-ah boralin, nimin khan vuiliam a ni.
PC Lalthakima hi taksa chaklohna hrang hrang neiin hunrei tak chhung bawksawpin a awm tawh a, kar hmasa khan Aizawl Civil Hospital ICU ah dah luh niin, a natna hian zual lam pan zelin a boral zui phah ta a ni.
An chenna Ainawn vengah nimin khan vuiliam niin, hla phuahtu leh zaithiam thahnem takin a ruang an thlahliam a, a hla phuah sa lartu hrang hrang pawh an ruang thlah hian an kal thahnem hle.
PC Lalthakima hian Rimawi Khawvel award buatsaihin, a hun laia zaithiam tak takin a hla an sa hlawm a, a hla phuah zinga lar zual deuh deuhte chu ‘Ka hmangaih Isua’ VL Neihthangi sakte, ‘Kum sangbi thar’ Liandingpuii sak te leh ‘Aw Zoram nuam’ Lalrindiki Khiangte sakte an ni a, hei bakah hian zaithiam thahnem tak a chherchhuak bawk.