Hun rei tawh tak avanga ramri chungchanga an buaina chin felna atana rahbi pawimawh tak tukin Assam leh Meghalaya state sorkar chuan Independence Day-ah hian an inrem lohna thin hmun ngaah ramri chhinchhiahna (border pillar) an phun dawn tih an chief minister ve vein an sawi.
Border pillar an phunna tur hi hmun 12-a an buaina zinga mi niin chhinchhiahna phun tur hian state pahnih hian March, 2022 khan inrema an lo siam tawh tih an sawi.
Assam Chief Minister Himanta Biswa Sarma leh Meghalaya Chief Minister Conrad Sangma te chuan state pahnih aiawhte an inbiak fo hnuah thuthar lakhawmtute kawm dunin an puang a ni.
“Hmun ruk atan bik inremna kan siam a, heng zinga pangaah hian August 15 hian border pillar kan phun dawn a ni,” tiin Sarma chuan a sawi.
“Heng hmun nga zinga pakhatah hian inrem chiah lohna kan nei a. Meghalaya hian kan lama khaw pakhat awm an duh a; mahse, anni hian ram thenkhat min pe dawn a. Chumi atan chuan chawlhkar khat hun pe turin kan dil a, kan inhrilh tha leh dawn a ni,” a ti.
Inremna an siam zinga hmun rukna chu Pilingkata huam chhung a nih thu Sarma chuan a sawi a, he hmun hi ‘sawi dan inang lo’ a awm niin a sawi.
“State pahniha deputy commissioner-te an inkawm ang a, an sawi dun dawn a ni,” a ti.
Sangma pawhin inrem lohna tenau tete chin fel a nih thu leh hmun ngaa border pillar phun tum a nih thu a sawi ve bawk a. “Ramria inmil lohna hi a tahtawla chin fel zel tur a ni a, tuna kan thlen chin hi kan inkara rahbi pawimawh tak a tling,” a ti.
Sarma pawhin state pahnih hian hmun ruk danga fel lo tihfel tumin hma an la zel dawn tih a sawi a, a hun bi erawh sawi theih a ni lo tih as awi.
Ramria 55MW Kulsi multi-purpose project kal mek pawh state pahnihin a thuphunga thawhho turin an ti.
“Kulsi hi state pahnih tana tha ve ve tur a ni a. A chhehvela chengte dinhmun azira thawhho turin kan ti a ni,” tiin Sangma chuan a sawi.
Sarma chuan state pahnih hian hydel project hi an buaipui dun ang a, Assam sorkar chuan he project hnuaia tuikawng bik chu siam zelin a thlanga Kamrup leh Golapara district-ten an chhawr tur a nih thu a sawi.
Assam leh Meghalaya hi km 884.9-a thui inriin hmun 12-ah ram an inchuh a. March, 2022 khan Union Home Minister Amit Shah hriatpuiin New Delhi-ah hmun ruk tihfelna tur inremna an siam a ni.
Thawh khatnaa hmun ruk buai tihfel hian sq km 36.79 huamin Assamin sq km 18.46 a chang ang a, Meghalaya-in sq km 18.33 a chang ang.
Meghalaya hi kum 1972-a Assam ram thena ding a ni a, hemi hnu atang hian Assam-in Assam Reorganisation Act, 1971 tlawhchhana ramri a pawm chinah ram an inchuh reng a ni.