Chelsea chuan a ngheta winger Jadon Sancho an lak dawn loh avangin Manchester United hnenah £ maktaduai 5 an pe dawn.
Sancho hi nikum nipui lai khan United manager Erik ten Hag-a nen an inhmuh thiam loh hnuah Stamford Bridge-ah loan-in an la lut.
United hian Borussia Dortmund atanga kum 2021-a £ maktaduai 73-a an lak luh, kum 25 mi, Sancho-a an chhuahtir hi an lawm hle.
Chelsea hian loan-a an lakna man engmah an chawi lo va, chawlhkar khata £300,000 a hlawh thin zahve an tum thung.
An inremnaah Blues hi Premier League-a 14-na aia sanga an awm chuan Sancho hi £ maktaduai 25-in an lei thei ang a, an lei duh lo a nih chuan United hnenah pawisa an pek a ngai dawn thung a ni.
Club leh player aiawhtu chu a ngheta inlei turin an indawr a; mahse, Sancho hian United-a a hlawh thin ang tihtlem a duh loh avangin an inrem thei lo.
England forward hian United-ah kum khat hun a la nei a, Dortmund-in a man £ maktaduai 17 an la chang thei dawn bawk.
Sancho hian Nilaini kal taa Conference League final-a Chelsea-in 4-1-a Real Betis an hneh khan goal a thun nghe nghe a, hei hi February, 2022 hnua nomawi an lak lehna hmasa ber a ni a. Tun season-ah vawi 42 inkhelin goal nga a thun a, mi dang thun tur vawi 10 a siamsak bawk.
Chelsea-ah hian June 30 thleng hun a la nei a, tun thlaa US-a Club World Cup-ah pawh a inlan a beiseiawm.