Blues hian Sancho lei dawn lo mah se AC Milan lam hawiin France goalkeeper Mike Maignan chu lak an tum mek thung.
Goalkeeper Maignan-a hian Stamgord Bridge pan a châk avangin lak theih ngei pawh an inbeisei.
Kum 29 mi, kum 2021-a kum nga chhung atana Lille atanga Milan a zawm hnuah hmun changtu nghet a ni.
January, 2023-a Hugo Lloris-a’n ram tana inkhelh a chawlhsan hnuah France tan pawh an rinrawl ber a ni zui ta bawk.
Chelsea hi kum 2018-a £ maktaduai 71-a Kepa Arrizabalaga an lak hnuah khan goal-a ding tur nghet an nei fuh hleithei lo va, Spanish keeper hi khawvela goalkeeper man to bera an lak ni mah se an chhawr zui lutuk lo.
Kum hnih hnuah Edouard Mendy an la lut leh a, ani pawh hian kum 2023 khan Al-Ahli panin a chhuahsan leh tawh a. Kepa hian season liam ta vawi hnih chu loan-in Real Madrid leh Bournemouth-ah hun a hmang bawk.
Kum hnih liam ta chhung khan Blues hian Robert Sanchez, Djordje Petrovic leh Filip Jorgensen te an la leh a; mahse, heng keeper pathumte pawh hian mit an tlung zo chuang lo.
Petrovic-a hian season liam ta khan loan-in Strasbourg-ah hun a hmang a. Sanchez leh Jorgensen te erawh Chelsea team-ah an la awm zel a; mahse, hmun nghet chang khawpin an che tha bik chuang lo.