Aizawl: Mizoram Mistiri Association (MMA) chuan khaw thenkhat VC-in an khaw chhunga mistiri ni khat hlawh (daily rate) bitukin, Rs 700-750 aia sanga thawk lo tura thu an chhuah chu an pawm theih loh thu an sawi.
Nimina an thuchhuahah MMA chuan, Mizoram sorkarin a hnathawkute hlawh bi a siamin mistiri a chhawr dawnin Skill I category, Group C level-a dah an ni a. Labour department hnuaia Construction Works minimum wages rate mila rawih an ni thin a. Minimum Wages Committee-in rate hniam ber aia hniama chhawr loh tur tih a ni. LESDE-in April 1, 2023-a hriattirna a chhuah ang chuan skill I hian Rs 730 aia hniam a hlawh tur a ni lo. Sorkarin a chhawr hian mistiri chuan kut ruakin a thawk chhuak mai thin, an ti.
Hemi ang hian mistiri chuan thawk thei an nih loh thu leh, a hmanrua a intum vek thin avangin MMA General Assembly 2018-a thu pass chuan mistiru ni khat hlawh hi Rs 600 (minimum) nise an ti a. Hmanrua engkim a intum vek tura tih a ni a. hetiang hian mistiri chuan thawk thin tur leh khawtlang hruaitute pawhin lo hriatpui a, an khaw chhunga mistiri-te hlawh chungchangah MMA duh anga lo rem tihsak turin an ngen.
Thil man to zel leh hmanraw man to zel avangtein mistiri Rs 800 aia hniam hlawh tura VC thenkhat thuchhuah chu an pawm theih loh thu leh, mistiri chu a thiamna leh a hmanraw hman dan azira Rs 800 aia sanga an chhawr thei a nih chuan an inbiak remna a nih tur thu an tar lang.