Aizawl: MZP chuan Health department-in National Health Mission (NHM) hnuaia advertisement chhuah lo leh dan tlawhchhan awm mumal lova hna pasarih a lak tawhte cancel turin sorkar an phut.
Thawhlehnia MZP Gen. Hqrs., Executive Meeting chuan, Health department hnuaia hnalakah advertisement pawh chhuah lo va, duhsak zawngte lak an awm tih thuthang an hriat bawhzuiin, NHM hnuaia post pasarih (Lab. Technician pathum, Staff Nurse pahnih, Asst. Data Manager pakhat leh Executive Asst. pakhat)-te hi advertisement tel lova lak ngei an ni tih an hria a; DP&AR(ARW) OM- Guidelines for engagement of co-terminus (contract or provisional or otherwise) employees under Centrally Sponsored Scheme/Central Sector Scheme/Externally Aided Projects, etc, 2021 tlawhchhan miah loa lak a nih avangin duhsak zawngte thunnaah a ngaih thu an sawi.
MZP chuan NHM hnuaia dan dik taka hna lakte hi, an website-ah awlsam taka en leh hmuh theih a nih hlawm laiin, heng an sawi tak hnate hi khawiah mah tarlan a ni ve loh avangin, a ruk a rala lak ngei tih a chiangah an ngaih thu an sawi a. Thalai hna zawng mek an intlansiak mup mup laiin, hetiang sawi a awm leh thin chu a la thutakin a haw takzet thu sawiin, tuna NHM hnuaia advertisement chhuah lova hna pasarih lai an lo lak tawh hi cancel nghal a phut tih an sawi a. June 10, 2025 thleng sorkar ngaichangin, hei hian awmzia a neih loh chuan hmalak zel dan tur a ngaihtuah dawn tih an sawi bawk.