Aizawl: Bawng vulh lama hma la tha thlanchhuahte hnenah ran kah rai (artificial insemination) chungchang inzirtirna chu nimin khan Directorate of AH & Veterinary Department, Khatlaah hawnna neih a ni.
He training hi June 3-6, 2025 chhungin Artificial Insemination Training Centre, AH&Vety Farm, Selesih-ah neih a ni anga. Tun tum training-ah hian bawng vulh lama hma la tha zual, Mizoram hmun hrang hranga mi paruk thlanchhuahte chu Dr M.S. Dawngliana, Veterinary Officer, N. Vanlaiphai leh Dr K. Lalchhanhima,Veterinary Officer (MVU)-te’n an zirtir ang a. Theory leh practical-in uluk taka zirtirna neihpui an ni ang.
Training hawnna inkhawm hi Dr F. Vanlalruata, Joint Director (LD&B)-in kaihruaiin, bawng zaa sawmhnihin rai lamah harsatna an nei thin a, ngun taka zira enkawl that chuan chu harsatna chu siam fel theih a nih thu a sawi.
Dr F. Laltanpuia, Additional Director (AH&DD) chuan training chungchang sawihawnna neiin, sorkar laipuiin bawng vulh chungchang a ngaih pawimawh thu leh, Mizoram hi tun dinhmunah bawng vulh lamah a hnufual avangin, hemi kawngah hmalakna tur tam tak a awm tih a sawi.
Kum 2019-a chhiarpui neihah Mizoramah bawng 45,701 a awm laiin, tun hnaia dinhmun lakkhawmah bawng 13,042 chauh a awm tawh avangin bawng neihchhunte uluk taka enkawl a, vulh pun nasat a tul thu a sawi bawk.
He huna khuallian Dr R. Zothanmawii, Director, chuan Mizoram chu bawnghnuteah a intodelh lo hle a, bawng vulh leh bawnghnute tharchhuahte pawh nasa taka a tlakhniam avangin, hemi kawngah tan an lak a tul thu a sawi.