PHE Department chuan GAWSS Phase I, II & III pump theih a nih rih loh avangin Aizawl mipuite chu ruahtui dah khawla inrenchem turin a ngen.
Nimina an thuchhuahah PHE dept chuan, tun hnaia ruah sur nasa avanga tui lian leh tui nu nasa avangin Aizawl khawpui chawmtu Greater Aizawl Water Supply Scheme (GAWSS) Phase – I & II te chu May 30 – June 3, 2025 thlengin tui pump theih a nih loh thu leh power transformer lam that loh avangin GAWSS – III @Setlak pawh May 26, 2025 atangin tui pump theih a nih loh thu a tar lang.
PHE chuan Vaivakawn – Zohnuai lei tlakhniamna hmunah, GAWSS – III tui pump-na pipe atangin June 2, 2025 khan nasa takin tui chhuak chu, tui pump loh lai a nih avangin hetianga tui lo chhuak vak mai hi a chhan hriatthiam a harin, helaia cheng mipuite an ralkhel hle tih an hriatin pawi an tih thu an sawi.
May 30, 2025 khan Zemabawk South (NH 54) kawngchhak lam inhmun laihna hmunah nasa takin lei a min a, he leimin hian a chhak tlang, Beraw Tlang panna kawng hrula kal, Assam Rifles leh Lungbial mipuite tui pekna pipe line a hnawl avangin, tun thlengin tui supply theih a la nih loh thu leh pipeline siamthat hna ngawrh taka thawh mek a nih thu an sawi bawk.
PHE chuan khuarel chhiatna hmun hrang hrangah thlengin hengte avang hian khawpui chhung tui semna lamah chhiatna nasa tak an tawk mek a. Heng chhan hrang hrang avang hian khawpui chhungah tuisem mumal theih a ni lo va. Khaw chin leh tui dinhmun hrang hrangte thlirin pangngai taka tui sem leh theih hun tur hi chiang taka sawi theih a nih loh avangin ruahtui dahkhawl lamah tan lo la zel a, PHE Department te tawiawm turin an ngen tih an sawi.