Aizawl: Vairengte Joint VC chuan Vairengte CHC-a Nursing Officer pahnih sawn chhuah order sut turin sorkar an phut.
Nimina thuchhuah an siamah Vairengte Joint VC chuan, tun hnaia Mizoram sorkara Health & Family Welfare department-in Nursing officer transfer & posting a tihchhuahah, transfer zingah Vairengte CHC Nursing Officer pahnih an telve chu hriatthriam harsa an tih thu an tar lang.
Vairengte Joint VC chuan H&FW Deptt. in Vairengte CHC tana Nursing Officer paruk an lak zingah, a khawmi duhsak an ni ang an ti chung pawhin, khawdang mi vek an la a, ngawi reng chunga an lo dawnsawn lai leh, hna laka an awmna hmun tur dik taka an awm chung pawha khawih chet leh nghal an ni chu tha an tih loh thu an sawi.
Vairengte CHC chu khaw dang CHC-te nena tehkhin chiah an ngaih loh thu sawiin Vairengte Joint VC chuan, work load-ah pawh a sang ber an ni chung a, an neihsa a heu zawnga inlaksak tumna a awm hi sorkar hian ngaihtuah thatsak se an duh tih an sawi a. Inter State ramria awm an nih avangin, issue hrang hrangah harsatna nasa tak an tawh thin thu leh indaih a ngaih zual thu pawh sorkar kaltaah leh tun sorkar thara deptt. changtu Minister hnenah pawh sawilan a ni tawh a, tawngka satliah ringawt ni lova a taka lantir turin an ngen tih an sawi.
Vairengte Joint VC chuan sorkarin tuna Nursing Officer pahnih a transfer sak hi a rang thei ang bera sutsak tura ngenin, an ngenna a hlawhtlin hma chu Vairengte CHC MO incharge pawh Release Order pe chhuak lo turin an nen a. An beisei ang thil a thleng lo a nih chuan a tul dan angin hma an la dawn tih an sawi bawk.