Aizawl: Mizoram state pumah ni eng emaw zat chhung ruah nasa tak a sur avangin chhiatna hrang hrang, leimin, lungrem chim, lung tla, tuilian leh sabereka khuangkaih te a thleng a, nunna hial chân phahte an awm bawk. He khuarel chhiatna thleng mek avang hian district hrang hrangah mipui nunphung a buai phah nasat avangin, sorkar laipui leh state dang atanga mi pawimawh (VIP) lo zin turte chu June 13, 2025 hnu lam hun remchang dang ruahman turin Mizoram sorkarin a ngen.
Mizoram sorkar chuan nimin khan thuchhuah siamin, district tina Deputy Commissioner-te kaihhruaina hnuaiah District Disaster Management Authority (DDMA) te chuan chhiatna thlenna hmun te urhsun taka vilin chhiat tawkte chhawmdawl hna ngawrh takin an kalpui mek zel a. Hetiang hi thil awmdan a nih avangin District-a hruaitute chuan ram pawn atanga VIP lo zinte pawh, lo mikhual leh lo dawnsawn kawngah harsatna an tawk tih a tar lang.
Indian Meteorological Department (IMD), Regional Meteorological Centre, Guwahati-in a puan lawk danin, thlipui leh ruahpui thawk reng thei dinhmunah Mizoram chu a lan avang leh chhiatna thleng mek leh thleng zel theite thlirin, mipui him tlan zawk nan leh chhiatna thlengte tih ziaawm leh chhanchhuah leh chhawmdawl hnate chak zawka hlenchhuah a nih theih nan, sorkar laipui leh state dang atanga mi pawimawh lo zin turte chu, June 13, 2025 hnulam hun remchang dang lo ruahman hram turin Mizoram sorkar chuan a ngen a ni.