Khuarel chhiatna hrang hrang kan tuar a, ruah leh thli avangin harsatna hrang hrang hmun tam takah thlengin, nunna hial chan phah an awm bawk.
Kan beisei phak loh leh kan inruahmannaa tel lo a nih miau avangin chhiatna thlengte hian min ti nguai a, kan chan a chau viauin kan hre hlawm bawk a ni thei. Mahse, harsatna hrang hrang a thlen rual leh thlen hnu a sorkar hnathawh dan hrang hrang erawh a fakawm hle.
Leimin leh electric chhia siam leh thianfaiin a kaihhnawih department an buai nghal char char a, kan tuilakna hmuna tui chim chin sang zel leh tui nu nasa tihfai tumin a kaihhnawih department an vir buai hle bawk. Sawi lan lem loh tam tak, buai tak tak pawh an awm bawk tih a chiang reng mai.
Mipuite tana sorkar department hrang hrang chetchhuah dan leh hmalakna hi a fakawm a, an tihtur ve rengah kan ngaiin fak vak an tul lo pawh kan ti a ni mai thei. Mahse, nunna thap tak meuh meuha an inpekna leh an hnathawh zuina erawh hi chu fak loh rual a ni lo a ni.
Mizote hi chhiat thata inpui tawn a, inlenpui tawn thin hnam kan ni a, chhiatna a thlena belh tur sorkar kan la neite hi a lawmawm a, kawng hrang hranga phut let nei hauh lova hnathawktute chetchhuah dan zawng zawngte hi i hrereng ang u.
Khuarel chhiatna dang dang pawh kan la tawng lovang tih a sawi theih loh a, chutiang a lo thlen leh tik niah pawh chuan mipui lam pawhin hnathawktute tibuai lovin tawiawm thiam ila, kan nunhona lo nuam zel mawlh rawh se.