Thawhlehni zing hma taka lir a nghin hnuah Pakistan-a khawpui lian bera lung in tang mi 200 chuang an tlan chhuak niin police-in an sawi.
Karachi-a Mahir Jail-ah hian lirnghingin a sawi hnuah mi tang sang chuang awmte chuan kawngka leh an tanna cell an tichhia a, tukverhte an tichhe nasa hle bawk.
Police chuan tlan chhuak zinga 80 chu an man leh nghal a, mi dang 130 chuang chu man tuma an zawn zui mek thu an sawi a. Man leh tuma beihpui an thlaknaah mi tang pakhat a thi a, prison officer pahnihin hliam an tuar bawk.
Prison superintendent chuan mi tangte hi lirnghingin a sawi chiah khan zan lai ni mah se an cell leh barrack-ah a chim mai hlauvin nasa takin an au tih a sawi.
Tharum thawhin an che zui a, police hian tihthaih nan silai pawh an hmet puak a, van vawr zawng pawhin an kap tih a sawi.
Tam tak chu an cell-ah an kir leh a, mi dang tam tak chuan gate-pui ber sawiin mi 216-te chuan remchang an hmuhah an tlan chhuak ta niin a sawi.
Police-te hian tlan chhuakte man leh tumin in tin an dap zui mek zel.
Malir district, Sindh province-a lung in hi an rama tan in lian ber pahnihna niin a tang thei zat aia tam an tang mek a. Mi 2,200 tan theihna tura ruahman niin mi 5,000 vel an awm nia hriat a ni.
Province Prison Minister Ali Hassan Zardari chuan chhuina tur thupek tichhuakin a tisualtu officer-te chu hrem ngei an nih tur thu a sawi.
Prison superintendent erawh chuan he thil thleng hi ‘venhimna lama thil tihsual a awm vang ni lovin khuarel chhiatna vang’ niin a sawi ve thung.
Lung ina venhim hna thawktute hi an inring em em a, thil thleng pawh a tawp thlenga bei letin tha an thawh tih a sawi.
Lung in tualah hian chhungkaw eng emaw zatin lungawi lohna an lantir zui a, police chuan mi tang chhungte hi an buai rih em avangin intlawh hun sawn a nih vanga lungawi lo niin an sawi.