AZL: Excise & Narcotics Department chuan Thawhlehni tuk khan New Diakkawn, Chal lui veng, Kolasib-ah Methamphetamine nei nia puh mi pahnih – Lalbiakhnuni (47), New Diakkawn, Chal lui Veng, Kolasib leh Lalrinchhani (42), New Diakkawn, C.P. Road Kolasib-a khawsa nia inchhalte an man.
END hotute hmaa an inpuanna bawhzuiin Thawhlehni vek chawhma khan Tumpui Veng, Kolasib-ah Methamphetamine Kg 2 & gram 900 (Tablet 30,000) leh hemia inhnamhnawih nia puh mi dang pali – Vanlalruaia (60), Tumpui Veng, T-Section, Kolasib; Lalbiakchhunga (34), Tumpui Veng, T-Section, Kolasib te, Ahmad Hussain (33), Ranugram, Karimganj District, Assam; Sadikul Haque (23), Singaria, Karimganj District, Assam-a khawsa nia inchhalte an man.
Methamphetamine phurh kualna atana an hman, Suzuki Access Scooter (MZ05A-3922) pawh hrensak an ni a. An thil mante hi Mizoram pawna hralh tum a ni.
Ruihhlo vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, June 4, 2025 khan District Court, Kolasib-ah hruai nghal an ni.