Aizawl: India rama zirna in sangte endika grade petu, National Assessment & Accreditation Council (NAAC) Peer team leh MZU Alumni-te nimin khan an inkawm a. NAAC Peer team hi MZUAA President Dr. Henry Zodinliana leh Prof. K. Robin, Coordinator, MZUAA leh Alumni member-ten an lo dawngsawng.
MZU Guest House Conference Hall-a an inkawmnaah MZU-a zir chhuak te’n Alumni Association kalpui a nih dante, khawtlang leh ram kaihhruaia an lo thawh tawh zawng zawngte NAAC team hotute an hrilhfiah.
An inkawmnaah hian MZU zirlai chhuak, Higher & Technical Education Minister Dr Vanlalthlana leh Supply Minister B Lalchhanzova te’n an telpui.
Thawhlehni atang khan NAAC team hian MZU endik hna an tan a. NAAC peer team atang hian member pakhat a hmunah rawn kalin, peer team member dangte online-in an telpui bakah virtual live tour buatsaih a ni.
MZU department hrang hrang leh campus chhunga hmun hrang hrang te vawiin hian an endik chhunzawm ang.
University Grants Commission hnuaiah NAAC hi autonomous body a ni a. Endik hna hi kum nga danah neih thin niin, kum 2019 khan MZU hi NAAC chuan grade A an pe a ni.