Aizawl: Home Minister K Sapdanga’n Phuldungsei khua Thaidawr tlang pan chhohnaah Mizoram IR-te dah tura hmalak mek a nih thu leh guest house sak chhunzawm tawh lo tura Tripura tourism minister a biak thu MZP hruaitute a hrilh.
Nilaini khan Home Minister K Sapdanga’n a pisa-a leng tura a sawm angin, MZP hruaitute nen an inkawm a. He hunah MZP hruaitute chuan Phuldungsei khaw bula Thaidawr tlang pawn chhohna turah Tripura sorkarin Guest House, Rs nuai 300 man an sak mek bakah, Tripura state rifle-te an duty reng thu leh, Mizoram state police-te pawh duty nghal se an duh tih an sawi.
Mizoram chhunga Tripura sorkarin buiding a sak mek, an ngaimawh avanga a hmuna an lo tlawh tawh thu an sawi a. Tun hnaiah mi tu tih hriat lohten an beih hnuah pawh sak chhunzawm an tum leh chu theihtawpa dodal turin home minister an ngen.
Home minister chuan MZP-ten ram leh hnam veia a mah an finchhuah thin leh theih ang anga hma an la thin chu lawmthu a lo hrilh a. MZP duhdan angin, Kawnpui M atangin Thaidawr tlang pan chhohnaah Mizoram IR te dah phei tura hma an lak mek thu MZP hruaitute a lo hrilh.
Tripura Tourism Minister nen an inbiak thu sawiin home minister chuan guest house sak chu chhunzawm tawh lo tura hrilh thu a sawi a. Official level-ah sawiho tura an ruahman thu a sawi.
Home minister chuan Tripura State Rifle-ten Thaidawr tlang pan chhohna turah check gate an lo siam ve ngawt pawh thiat nghal tura an hrilh thu a sawi a. MZP-in Phuldungsei khawtlang hruaitute hnen atanga thu a dawn danin, Check Gate chu thiah nghal a ni.
MZP chuan home minister hmalakna avangin lawmthu an hrilh a, Jampui tlangdunga Mizo mipuite leh Mizoram khua leh tuite venghim tura theihtawp chhuah zel turin an ngen nghal a. Ramri kalpawhna kawngpuite chu tun aia ngaihsak lehzual turin an ngen bawk.