Aizawl: Congress party chuan Health Minister Lalrinpuii chu thu dik lo sawiah puh.
Nimina MPCC thuchhuah chuan ZPM Southern Hqrs, Lunglei Party chhung inkhawm leh political session-a health minister-in Aizawl Private Hospital-te nen an inrem lawk theih loh chhan sawiah ‘Sorkar hmasa lama bat ralsak a tam thin em vang a ni, tunah chuan nasa taka an inngen hnuin cashless thei turin inbiakna an kalpui reng a ni’ tia a sawi chu thu dik lo a ni, a ti.
Sorkar hian a bain cashless-in damlote enkawl turin private hospital-te hi a turlui a, an duh lo phawt zawk a. Private hospital tereuh tete tan ba ringawta inenkawlin an tlin loh an hlauh vang a ni. Hei bakah sorkarin damlo enkawlna tura rate a siamte chu hman mekte aiin zaa 50-70-in a tlawm zawk a, private hospital te tan MUCHS chu pawm theih a ni lo zawk, a ti.
“Health minister-in heng harsatnate hre veka sorkar hmasatena an bat ralsak a tam em avanga MUCHS hi kalpui mai thei rih lo tia mipuite dawt a hrilh mai hi a dik lo hle. Harsatna tawh apianga sorkar kaltate a rem leh rem lo pawh dawn lova dem kur luai hi mahni hamthat nana mipui rilru lakpen tumna niin a Mizo-Christian zia lo hle bawk,” tiin, research-based veka kala inzuar leh ruahmanna lo siam vel fek tawha insawite hian, sawi loh anga awm zel lovin an sawi anga awm zel tum tawh se an duh tih an sawi.