External Affairs Minister S Jaishankar chuan Pathianni khan chawlhkar khat chhung Europe ram fang turin a zin chhuak a. France, European Union leh Belgium hruaitute kawmin an inkar thil theuh bakah India-in firfiak awm lohna tura hma a laknate a tlangaupui ang.
Jaishankar-a’n Europe a tlawh tur hi Pahalgam-a mi firfiakten mi 26 an thah chhan let nan India-in Operation Sindoor kalpuia hma a lak dan chu European hruaitute sawipuiin ramri kâna firfiaka chetna laka New Delhi dinna a sawipui bawk ang.
A tlawh hmasak ber tur hi France niin anni hi New Delhi nena inthian tha sa an ni a. “External affairs minister hian Paris leh Marseille tlawhin Europe & Foreign Affairs Minister Jean Noel Barrot nen an inkawm ang,” tiin MEA chuan a tar lang.
Jaishankar-a hi Marseille-a Mediterranean Raisina Dialogue-ah a tel bawk ang.
Brussels-ah Jaishankar-a hian EU High Representative leh Vice President Kaja Kallas nen an inkawm ang.
“India-European Union thawhhona hi kum tam tak chhung a nghet em em a, EU College of Commissioners to India-in February-a India a lo tlawh khan huang dang dangah inpawhna thuk zawk siam thar a ni bawk,” tiin MEA chuan thu a chhuah.
Jaishankar-a hian European Commission leh European Parliament-a hotu liante pawh a kawm dawn.
A hnuhnung berah external affairs minister hian Belgium hruaitute a kawm ang a. Deputy Prime Minister leh Foreign Minister Maxime Prevot nen ram pahnih inkar hrang hrang an sawi dun ang.
A tlawh ramahte hian Indian awmte a tlawh dawn bawk a ni.