Kan kungpui, kan engkima engkim, min duhsak bang lotu Lalngaizuali,65 chuan hun lo tak maiin min kalsan ta.
Thih hmabak theuh nimah ila kan chunga a thlen kan phal lovin, kan duh lo vek a, mah se kan dan theih erawh a ni si lo. Ani pawh hun rei tak natna hrang hrangin a tlakbuak hnuah zirtawpni zan khan min kalsan a, inrinni khan hmu leh ngai tawh lo turin kan thlahliam ta.
The Zozam Times tan chuan chhiatna nasa tak a ni a, tawrhna tawp thei lo tur a ni bawk. Kan duhthu nise khami ni kha thleng ngai lo turin kan chelh tang tang ang a, kir leh ngai tawh lo tura a kal hi kan phal ngai lo ang.
Inrinni khan kan ngui a, kan nguai a, kan ngurchuai a ni ber a. Inhnem tur chuang awm lovin kan awm tlang a, ka tan inhnemin awmzia a nei lo chu a ni ber asin.
Min duhsak bang lo tu kha, min uap lum reng thintu kha a kal ta a, kan chanchinbu chhungkaw bik ngat tan phei chuan chhiatna vawrtawp a va ni chiang em.
Leiah hian vul reng tura duan ni lo mah ila kan vul chhung hi a rei mawlh bawk si lo. Kan la mamawh leh thlakhlelh em em laiin laksak kan ni a, ruahmanna min siampuitu leh kan kutke, kan chanchinbu khawvel eng kan hmuhna ber chuan kir leh tawh ngai lo turin min herliamsan ta.
A tan kan tihtheih a tlem a, chelh duh viau mah ila kan chunga thuneituin a angchhungah awmtir a duh zawk tawh si. Kan lusunna hi min hriatthiampui kan beisei e.