Aizawl: Sinlung Hills Council (SHC) huam chhung khaw 31 tan Sakawrdai SHC Office, Tourist Lodge tualah kuhva tiak semna hun hman a ni.
Kuhva tiak semna hun puala inkhawm kaihruaitu SHC chief executive member (CEM) Ricky Lalremsanga chuan SHC huam chhunga kuhva chingtute tan sum leh pai tam tak senga an sem chhuah chhan sawiin, SHC-in sum leh paiah harsatna nasa tak a tawh mek rualin, SHC hotute’n Hmar mipuite chu retheihna leh harsatna atanga khaichhuah ngei an tum a, chu chu SHC pianna tur atana Hmar pasaltha leh Hmar hnam tana martar-te duh dan a nih ngei a rinawm tih a sawi.
CEM chuan, SHC sorkarna leh thuneihna chu thlan tlinte chauh ta a nih loh thu sawiin, “Khawvel hmun hrang hrang leh India ram chhung Hmar mipuite ta a ni,” a ti a. Hmar hnam chu lungrual taka kala, engkawngah pawh hlawhtling tlak leh taima taka hna thawk tura a sawm bakah kuhva tiak dawng zawng zawngte pawh eizawnna puitling an neih theih nan duhsakna a hlan.
Sinlung Hills Council-a Argiculture changtu Lalhriatchhunga Hmar pawhin, “SHC-ah hian MNF leh HPC(R)-in sorkar chang mah se, thlei bik nei loin Sinlung area chhunga kuhva ching a duh apiangte tan kuhva tiak hi sem a ni a. Sinlung area chu party politics chhiain a chenchilh ve a rem lo a. Kan zavaia unau kan nihna anga inhmangaih tawn tur leh thliar bik leh thlei bik chu SHC sorkar MNF leh HPC(R) hotute duh loh ber a ni,” a ti.
SHC Ariculture changtu chuan SHC area chhunga kuhva chingtute chu, thuneituten kuhva tiak an sem mek chu an sem chhan leh rilrute hriatthiampuia, tih tak takna nena enkawl turin a ngen nghal bawk.
SHC hotute hian Sinlung Area bial 12 chhunga khaw 31 taan kuhva tiak 45,000 a sem chhuak a ni.