Supply Minister B Lalchhanzova’n Chief Minister Lalduhoma kaihhruai ZPM ministry hnuaiah induhsakna uchuak leh sorkar hnathawkte kut phuarsak a bo tih a sawi a; kalphung hlui sorkar ang kha neih leh a hlauhawm tih a sawi.
Thawhtannia ZPM-in an party pisa-a chhung inkhawm an hmanah Minister B Lalchhanzova chuan sorkar hnathawkten ram hmangaihtu tak tak ministry hmu tawh lo tura an inngaih laia, CM Lalduhoma kaihhruai ZPM ministry a lo piang chu an phur thar hle tih sawiin, “Hna thawh turin a hmuak a, anmahni tul leh pawimawh tihman lo khawpin thahnem an ngai thin,” a ti.
Aizawl East II bialtu MLA B Lalchhanzova chuan, ZPM ministry hnuaiah induhsakna uchuak leh sorkar hnathawkte kut phuarsak a bo tih sawiin, “Dan hnuaiah thil a nih dan turin a kal chho mek a. A hlawhtlinna kan chhiar chho mek a ni,” tiin, hengte hi minister-ten huaisen taka hma an hruai vang nia sorkar hnathawkte’n an sawi chu thil lawmawm tak a nih thu a sawi.
B Lalchhanzova chuan Congress leh MNF te hi an thawkho zel dawn em tih chu zawhna lian tak a nih thu a sawiin, “Kum 37 zet ram lo hruaitu Congress leh MNF party te kha ZPM party lo pian hma zawng kha chuan ui leh kel thlun pawlh ang maiin an inhal thin hle a, chu chuan politics tuinu hringchhuakin mipui an tichi-ai hle thin,” tih sawiin, kalphung hlui sorkar ang kha neih leh a hlauhawm hle tih a sawi.