Inrinni zan hian Hard Rock Stadium, Miami, Florida, USA-ah FIFA Club World Cup 2025 chu Major League Soccer (MLS) club Inter Miami leh Egyptian club Al Ahly inhmachhawnin khelh tan a ni dawn.
Khawvela league lian leh tha ber bera player langsar sa tak tak an inlan dawn bakah mi hriat la hlawh lutuk lote pawh thla khat awh inelnaah hian an inlan ang.
Ngaihven hlawh zual tur tlem thlir teh ang:
- Lionel Messi (Inter Miami)
Record siama Ballon d’Or vawi riat zet la tawh, mi thenkhatin a hun laia footballer ropui bera an chhal, Messi hi Club World Cup-a en hlawh a ni leh dawn.
Kum 37 mi forward leh Inter Miami captain hian MLS team hi Club World Cup-ah anmahni tantute hmaa khel turin a hruai thleng a, an vawi khat inlanna tur a ni.
Inter Miami tana season tluana a inlan hmasak berah vawi 25 inkhelin goal 23 a thun bakah a thiante thun tur vawi 13 a siamsak a, MLS Supporters’ Shield chu kum 2024 khan a lakpui a. MLS season kal mekah vawi 20 inlanah goal 15 a thun leh tawh bawk.
Inelna khelh chhunga kum 38 tling tur hian Inter Miami hi kum 2023-a a zawm atangin mi ngaihven club-ah a chhuah.
- Kylian Mbappe (Real Madrid)
France forward Mbappe hian kum 2024 khan Real Madrid zawmin a season hmasa berah La Liga-ah goal 31 thunin thun tam ber a ni.
2024-25 season chhungin vawi 56 a inkhelhah goal 43 a thun a, Real Madrid tana season inlan vawi khatnaa goal thun tam ber record thar siamin Ivan Zamorano (1992-93-a goal 37 a thun) leh Cristiano Ronaldo (2009-10-a goal 33 a thun) a khum.
A season khatnaah UEFA Super Cup leh FIFA Intercontinental Cup a lakpui a, kum 26 mi hian Real-in vawi nga an lo lak tawh, Club World Cup hi lakpui a tum hle.
- Vinicius Jr (Real Madrid)
Brazilian hi tun tuma Madrid player dang hmingchher thei tura ngaih zingah a tel.
Kum 24 mi hian season liam taah Spanish giants tan vawi 52 inkhelhah goal 21 thunin mi dang thun tur vawi 15 a siamsak a, La Liga-ah pahnihna a nihpui.
Kum 17 mi a nih laia Real zawmtu, Vinicius hi talent nei tha ber zinga ngaih niin 2024 Ballon d’Or khan pahnihna a ni.
- Harry Kane (Bayern Munich)
Kane-a hian 2024-25 season kha a inkhelh ve tawh china a tawn san ber niin Bayern Munich chu Bundesliga-ah champion-pui a, nomawi lian a lak hmasak ber a ni.
Kum 31 mi hian Bundesliga record thar siamin a season hmasa pahniha goal thun tam ber ni ve ve thei hmasa ber a ni a. Season liam taah goal 26 a thun.
England captain Kane hian a mi mala record thar a siam rualin Bavarian-te nen ‘season duhawm tak hmangin duhthusamin an tawp’ tih a sawi.
Englishman hi a vawi thum nana Bayern-in Club World Cup an lak leh theihna atana an innghahna a ni dawn a, an lak hnuhnung ber chu kum 2020 kha a ni.
- Erling Haaland (Manchester City)
Haaland hian 2024-25 chhungin City tan vawi 44 inlanah goal 31 a thun a, Pep Guardiola-a team hi Premier League-ah pathumna a nihpui a. Champions League khel turin inhlang kai mah se Haaland hian a zawna vawi nga champion an tumna erawh a tihhlawhtlingpui thei lo.
Season duhthusam hmang lo mah se Norwegian hian Club World Cup hi a vawi khat nan City tan lak a tum hle a, kum 2023-a an lak tum khan a inhliam avangin a khel ve lo.
Kum 24 mi striker, goal a thun theih em avanga hriat hlawh hi season liam taah Premier League-a goal thun tam pathumna niin goal 22 a thun.
- Ousmane Dembele (Paris Saint-Germain)
French forward Dembele hi PSG-in 2024-25 Ligue 1 an thununnaah a thawh hlawk ber pawl niin Parisian club hi point 19 zeta sang falin a champion-pui.
Vawi 29 a inlanah goal 21 thunin a vawi khat nan thun tam ber a ni a. Kum 28 mi hi Ligue 1 Player of the Season atan thlan a ni.
Champions League-ah goal riat thun bawkin Europe-a inelna ngaihhlut hlawh berah an champion bawk.
PSG hian tun season-a nomawi pangana lak an tum chuan Dembele chet that a ngai a. Ligue 1, Coupe de France leh French Super Cup bak lak an tum dawn.